Guwahati, Lber:
Ka seng Bharatiya Janata Party (BJP) kan sa ïakhun na ki 11 tylli ki kynstitwensi ha ka ilekshon Lok Sabha ka ban wan ha Assam kumba la pynbna da u Myntri Rangbah jong ka jylla u Himanta Biswa Sarma. Katkum ka jingïathuh ka tyllong khubor, la ong ba ka seng AGP kan sa ïakhun na Barpeta bad Dhubri, katba ka seng UPPL kan sa pynïakhun ïa u kyrtong na Kallies ha kaba kan sa ai jingkyrshan ïa ki kyrtong ha baroh 14 tylli ki konstitwensi, la ong u Sarma.
U la ong ruh ba ka seng UPPL kan sa ïakhun na ka bynta ka Kokrajhar konstitwensi bad ïa kane la kubur da ka seng BJP ruh.
“Ka seng AGP, kaba la treikam ha kylleng ka jylla, ka la kwah ban ïakhun shuh shuh khambun ki konstitwensi. Hynrei nga buh ka jingkyrpad na ka bynta jong ki ba ki dei ban ïakhun ha kane ka por na ar tylli ki konstitwensi, bad ki la mynjur ban leh kumta,”la ong u Myntri Rangbah.
U Sarma u la pyntip ruh ba ki la don ki kyrtong kiba thymmai ki ban sa don bynta ban ïakhun ïa ka ilekshon ka ban sa wan.
“Kane ka la long namar ba ki la don bun ki MP kiba la mih na ka liang jong ka seng BJP kiba la pynpaw ba kim kwah ban ïakhun ha kane ka por,” la ong shuh shuh u Myntri Rangbah. Ka seng BJP ka la don 9 ngut ki MP ha kane ka Lok Sabha ka ban sa leit noh kiba na Assam, katba na ka seng AGP bad ka UPPL ym shym la don ba mihkhmat, ka seng Congress ka la bat ïa lai tylli ki konstitwensi bad ka seng AIUDF kawei, katba kawei pat ka la don bad u kyrtong shimet.
