Washington, Lber:
U President ka United States, u Joe Biden ha ka Sngi Thohdieng u la ong ba ka US ka kyrmen skhem ba ka thma jong ka Israel pyrshah ia ka Gaza kan sangeh noh shwa jong ka jingleh niam ba khuid ki jaitbynriew Muslim- ka ‘Ramadan’. Hynrei la ong ba ym pat lah ban pyntikna ia kane namar kam pat don kano-kano ruh ka jingiakren kaba shai ne ka jingiamynjur hapdeng ka Israel bad kino-kino ki ri ne ki tnat.
Pynban haba ai jingkren sha ki lad pathai khubor ha White House ha katei ka sngi, u Biden u la ong ba ka US ka dang ialeh shitom kumno ban thaw lad- thaw lynti ban ioh pynsangeh noh ia katei ka thma hapdeng ka Israel bad ki lehnoh Hamas kaba la ktah jur ruh khamtam eh ia ki paid nongshong shnong ba lui-lui jong ka nongbah Gaza.
Namar la ong ba katei ka jinglehniam bakhuid ki jaitbynriew Muslim ka lah ban sdang ha ki 10 lane 11 tarik jong une u Lber, bad kumta la ong ba ka United States kumba long ka Qatar ha kine ki khyndiat sngi ba la leit, ka la dep ban kren bad ban jur halor kane kajuh ka phang. Namar kata, ka la ong ba ka Qatar ruh ka kyrmen skhem ba yn lah ban pynsangeh noh ia ka thma jong ka Israel ha shwa ban poi katei ka jingleh niam khnang ba kan ym mih kano-kano ka jingkulmar ne jingjia ba sngewsih hapdeng katei ka jingleh niam bakhuid jong ki jaitbynriew katei ka ri.
