Kolkata, Lber:
Ha ka por ba dang shah kynthoh bha na ka seng BJP bad na ki seng ka liang pyrshah halor ka mat ba ïadei bad ka Sandeshkhali, ka seng kaba bat ïa ka jingsynshar ha West Bengal ka Trinamool Congress (TMC) ka la pynbna ban pynlong ïa ka jingïalang paidbah kaba heh ha Brigade Parade Ground kaba ha Kolkata ha ka 10 tarik, Lber ban ïakhih pyrshah halor ki jingleh donbor jong ka sorkar kmie pyrshah ïa ki projek ai jingmyntoi sha ki paidbah jong ka sorkar jylla.
Ha kane jingïalang paidbah yn ai jingkren da ka heh nongïalam jong ka TMC ka Mamata Banerjee bad u General Secretary jong ka seng ha ka ri u Abhishek Banerjee, la ïathuh ka tyllong khubor kaba la wan na ka seng. Kum shi bynta ban pynbna halor kane ha ka rynsan lad pathai X, u Abhishek Banerjee u la ong ba ïa kane ka jingïalang paidbah la tip kum ka ‘Jana Garjan Sabha’ yn sa pynlong sha kiba bun ki jaka ka ban sdang shwa na Bengal.
Ka rai ban pynlong ïa kane ka jingïalang paidbah kaba heh ka la long ha ka por ba la don ka jingïakhih halor ka Sandeshkhali ba ki longkmie na ki jaka nongkyndong kiba la pynshisha ba ki la shah leh donbor ha ki nongïalam jong ka seng TMC ha ka thaiñ ha ryngkat ka jingdonkti lang jong u nongïalam ka seng uba dang shah kem shen u Sheikh Shahjahan. Ka jingjia ha Sandeshkhali kaba don ha North 24 Parganas jong ka West Bengal ka la shah peit khmat ha kiba bun, naba ki nongïalam jong ka liang pyrshah kiba kynthup ïa u Suvendu Adhikari bad u Sukanta Majumdar ki la leit sha kane ka thaiñ ban ai jingkyrshan sha ki nongshong shnong.
Ha kaba ïadei bad kane, ka seng TMC ka la kynnoh ba ka seng BJP ka la pyrshang ban ïakren bad ki paidbah bad ban pynduh ïa ka shongsuk-shongsaiñ, khamtam hadien ba ka la don ka jingleit khynra jong ka kynhun ED ha ka jaka sah jong u Shahjahan ha u bnai Kyllalyngkot.
