Islamabad, Lber
U Shehbaz Sharif un wanphai biang kum u Myntri Rangbahduh ka Pakistan ha ka sien kaba ar hadien ba ka Parliament ka la jied ïa u ha ka Sngi U Blei.
U Sharif, 72 snem ka rta, u la long teng u Myntri Rangbahduh ha ka sorkar synrop hadien ba u Imran Khan u la shah weng na kane ka shuki. Lah ban kdew ba u la long u Myntri Rangbahduh haduh u bnai Nailar 2023 hadien ba la pynwai noh ïa ka Parliament. Ka ilekshon sha Parliament jong ka Pakistan ka la long ha u bnai ba la lah.
U Sharif u la long u kyrtong mon lang na ka bynta ka shuki Myntri Rangbahduh jong ka seng Pakistan Muslim League-Nawaz (PML-N) bad ka Pakistan People’s Party (PPP). Une u nongïalam u la jop da kaba suk hadien ba u la ïoh 201 vote ha ka Parliament kaba don 336 ngut ki MP.
U Omar Ayub Khan, uba dei u kyrtong uba la ïakhun pyrshah ïa u Sharif na ka seng Pakistan Tehreek-e-Insaf (PTI) ba la lam khmat da u Imran Khan, u la ïoh tang 92 vote.
Ïa ka jingpynbam smai ïa u Sharif yn pynlong ha ka 4 tarik Lber ha ka ïing sah u President ka Pakistan. Lah ban kdew ba u Sharif u la long teng u Myntri Rangbahduh ka Pakistan naduh u Ïaïong 2022 haduh Nailar 2023 hashwa ban pynwai noh ïa ka Parliament ban pynlong da ka ilekshon bathymmai.
Une u Myntri Rangbahduh bathymmai ka Pakistan u la ai khublei ïa ki MP bad ki seng kiba la kyrshan bad pynpaw ïa ka jingshaniah ha u bad ban pynlong ïa u kum u nongïalam jong ka Parliament. Ha kajuh ka por, u la ai khublei kyrpang ïa u hynmen jong u, u Nawaz Sharif uba dei ruh u Myntri Rangbahduh ka Pakistan ha ki snem kiba mynshwa bad uba la bat ïa kane ka kam la saw sien.
U la ong ba u hynmen jong u, um ju don satia ka jingmut ban leh eiei ka basniew pyrshah ïa ka Ri lajong ym kumba long kwiei pat kiba ïakhun pyrshah ïa u ha ka saiñ hima sima ha Pakistan.
Haba ai jingkren, u Sharif u la kynthoh ruh halor ka mat kaba ïadei bad ka Kashmir, hynrei u la kular ba un pynbha ïa ka jingïadei bad baroh ki Ri bad kumjuh ruh ki Ri kiba don marjan bad ka Pakistan.
