Shillong, Lber 04
Ki ar ngut ‘rang ïalehkai shapdeng ka Barcelona kata u Pedri bad u Frenkie de Jong kin duh ïalehkai ha ka Champions League pyrshah ïa ka Napoli hadien ba ki la mynsaw ha ka lympung La Liga ha ka taïew ba la dep, la pynthikna kane ka klob na Spain ha ka Lah Sngi U Blei.
U De Jong uba dei u ‘rang ïalehkai na Nether-land u la mynsaw ka kjat, katba u rangïalehkai ka Spain u Pedri u la mynsaw (hamstring) ha ka kjat kamon ha ka Sngi U Blei hadien ba ka kynhun jong u ka la ïakhaid khlem don ba thep kol ha Athletic Bilbao.
Ka Barca kam shym la sngewthuh ba kine ar ngut ki ‘rang ïalehkai, hynrei ki lah ban duh ïalehkai palat shibnai bad kin duh ïashim bynta ruh ha ka pre-quarter final jong ka Champions League pyrshah ïa ka Napoli ka ban long ha ka taïew ka ban wan.
Katei ka kynhun kaba la bat ïa ka nam lahduh haduh san sien ha ka Champions League kan ïakhun pyrshah ïa katei ka lahduh na Italy ha ka 12 tarik u Lber bad ha ka wat kaba nyngkong ki la ïakhaid mar 1-1 kol.
Dangshen mynta ka aïom u De Jong u la ngat ha ka jingmynsaw ka kjat kamon, katba u Pedri u la mynsaw ha ki bynta jong ka khohwah.
U Pedri u lah duh ban duh ïalehkai na ka bynta ka Spain ha ka jingïaleh-kai paralok pyrshah ïa ka Colombia ka ban long ha London ha ka 22 tarik mynta u bnai bad hadien saw sngi kan ïakynduh pyrshah ïa ka Brazil ha Santiago Bernabeu.
“Baroh ar ngut ki long ki rangïalehkai kiba kongsan na ka bynta ka jingïalehkai ka jong ngi. Te kumta ka long ka jingduh kaba khraw na ka bynta jong ngi,” la pynpaw u coach ka kynhun u Xavi Hernandez ha ka sngi U Blei, hadien ba kane ka kynhun ka duh ban jam sha ka kyrdan ba-ar namar ka jingïakhaid.
