Jowai, Lber 04
U nongïalam jong ka VPP, Bah Ardent M Basaïawmoit u la ong ba kat haduh u snem 2025, Lber 31 tarik ka ram jong ka sorkar jylla kan kot ïa ka 15 hajar 500 klur tam eiei bad ka sorkar ka pynpaw ba ka lah ban siew na kata tang kumba 2 hajar 7 spah 33 klur.
Une u nongïalam ka VPP u la ong, kita ki prokram kiba ai kyrteng ki CM-Elevate ym tip ki dei ban kyntiew ïa u CM ne ban kyntiew ïa ki samla bym ïohkam ïohjam, hynrei kaei kaba une u nongïalam u la ong, ka long nangno yn ïoh ïa kata ka pisa ban pyntreikam ïa kine ki prokram bapher bapher.
U la ong ruh katba nangmih kawei ka snem kane ka ram ka la nangkiew, hato kam don ka jingma ïa ka jylla bad ïa ka jaidbynriew? Bad u la ong dei namar kata ka daw donkam ban ïoh ïa ki nongmihkhmat kiba sngewthuh bad shemphang ïa ka jingeh jong ka jylla bad ka jaidbynriew.
“Kum ki nongïalam ka VPP kam dei tangba la jied, la jop bad la kren ha ïingdorbar hynrei ngi sngewthuh ba donkam ban pynshai ïa ka jingmut jingpyrkhat jong u paidbah, ngi ngim don pisa ban ai hynrei ngi ai ka jingai kaba kordor tam ka ban ai ka jingstad kaba phin nang ban rai ïa la ka jong ka lawei ka lashai lashisngi kumno ban jied ïa uta u MLA bad ba phin tip ïa ka kamram ka jong uta u MLA bad ba phi tip kaei ka hok ka jong phi,” la ong u Bah Ardent.
U MLA u dei uba ki paidbah ki la siew da ka dor bad phi jied ïa u ym dei ba un wan shongkai ïing ïap briew, plie Fete hynrei phi jied na ka bynta ban leit ïasaid na ka bynta ki jingeh jong ka dong ka thaiñ, ong u Bah Ardent.
“Ka long kaba sngewsih ka jingkyrduh kam kyrduh jam ha kine ki sngi kiba mynta bad ka sorkar kam lah ban thaw kam thaw jam, ban treikam sorkar ruh ïoh tang kiba don jingïadei bad u MLA ne Myntri lane kiba don ha syndah,” u la ong.
U la ong katkum ka jingïoh jingtip jong u ha kine ki sngi ba ha rilum Jaiñtia, wat kiba la ïoh kontrak ruh la sha knieh noh. Nalorkata u dewïong, u maw u shyiap, ka dieng ruh la khang ki paidbah kin ïatrei da kaei?
Haba ïadei bad ka jingngop ki samla ha u drok bad ka kyiad, u la ong, “Nga pangmet ban ïohi ïa ki samla kiba ngop ha ka kyiad ha u drok, la ka long hapoh Jowai, ne ha kiwei kiwei ki jaka, ki jong ngi ki la ngop namar balei, ym don jingkyrmen ïa ka jingim bad ym don mano mano ban ngiat ïa ki sha ki kam kiba bha bad ki la shu pynlehnohei ha ki kam pynsngewbha ïa la ka jingim.”
Shuh shuh u la ong, wat ka sorkar hapdeng ka jingduk jingkyrduh ruh ka dang don por ban pynlong ïa ki jait pa ki jait tamasa lehkmen ki ban pynngop bad pynjot ïa ki khun samla.
“Ngim ong wat leh sngewbha tangba haba leh sngewbha, leh da ka pisa lajong keiñ, ynnai pan na i Mei i Pa,” la ong u Bah Ardent.
