Shillong, Lber 04
Ka kali kaba la shah tuh jong u nongñiah Ferrari barim ka Austria u Gerhard Berger hadien ka San Marino Grand Prix kaba la long ha u snem 1995 la lap pat ïa ka, la pynpaw ki pulit ka Metropolitan ha ka Lah Sngi U Blei.
U Berger bad u khlur nongñiah F1 u Jean Alesi ki la duh noh ïa ki kali jong ki ha kajuh ka sngi ha u Ïaïong jong u snem 1995 ha ki nongtuh kiba trei marjan bad katei ka jaka pynher kali kaba ha Imola.
Utei u nongñiah uba na Austria u la pynpaw ba kali F512M Testarossa rong saw ka la jah na shabar ka ïingbasa kaba u sah.
Ki pulit ka Metropolitan jong ka nongbah London ki la ïathuh ba ki la pynlong ka jingtohkit ha u Kyllalyngkot hadien ki la ïoh ka jingujor na ka Ferrari, ha ba ki la pynlong ka jingkhynra ban lap ïa katei ka kali namar ki la don ki nongthied kiba na US lyngba ka UK ha u snem 2023, ha kaba la pynpaw ba ka dei ka kali kaba la shah tuh.
Te kumta na ka liang ki ophisar ki la pynlong ka jingtohkit hapoh saw sngi, na ka bynta ban lap ksai namar la ong ba katei ka kali la kit sha Japan hadien ba la shah tuh na u Berger bad hadien la thied ha UK hashwa ban kut u snem 2023.
Ki pulit ki la ïai bteng ka jingtohkit khnang ban ïada na ka jingkhaïi biang na UK.
“Ka kali Ferrari kaba la shah tuh, ka shongdor kumba £350,000 ($443, 000), ka la jah la palat 28 snem hashwa ba ngin lap biang tang ha ki saw sngi,” la ong u Mike Pilbeam, uba la shim ïa ka jingkitkhlieh ban tohkit halor ka bynta ka bynta.
“Ngi la ïatrei lang bad ka National Crime Agency, kumjuh ka Ferrari kaba long ka nongpynïaid ïew ïa kine ki kali,” u la bynrap.
Kumba ka paw u Berger u la long uwei na ki nongñiah uba paw bha ha ki 14 tylli ki aïom jong ka jingïakop ñiah Formula One, kaba la sdang hau snem 1984 bad uba la pynkut noh ha u 1997, hadien ba u la jop shiphew sien ha ka Grand Prix bad uba la wan ha ka kyrdan balai ar sien ha ka championship ha ka por ba u danglong u ñiah na ka bynta ka Ferrari.
