Jowai, Lber 04
“Ngam ngeit ïa ka jingong jong kiwei ki MLA ba sha Jaiñtia khlem ka pisa te um long ha ka ilekshon, balei baroh u Pnar u lalot pisa lut?,” la ong u nongïalam ka VPP u Bah Ardent M Basaïawmoit haba kren ha ka jingïalang paidbah ba la pynlong ha Seiñraij Complex, Ïawmusiang hakhmat ka shlem treikam DC ha ka 4 tarik Lber.
“Ngam ngeit, lah ban don u Pnar 20 na ka 100, u Bhoi 20 na ka 100, u Maram, u War 20 na ka 100 lehse uba kwah pisa hynrei 80 na ka 100, nga ngeit ki dei ki briew ki bym kwah pisa, ki dei kiba dang beit ka rukom pyrkhat,” la ong u Bah Ardent.
“Dei namar kata ka daw ngin ïeng rangbah kum kita ki briew kiba beit ka rukom pyrkhat, ngin ïeng rangbah bad nga kwah ba ka thaiñ Jaiñtia kan pynlyngngoh ïa kiwei pat ki District lyngba ka ilekshon MP, ha kaba kin ai ïa u nam tam na kane ka thaiñ ïa u kyrtong ka VPP u Dr. Ricky AJ Syngkon khnang ba baroh kin tip ba pleng ym lah ban shu kynnoh lut ba kita ki Pnar ki long kiba biej pisa, tang namar ba leh sniew uwei ngin shu kynnoh lut ïa baroh,” u la ong.
Kumta u la kyntu ïa ki paidbah ban long kiba stad bad wanrah sa shisien pat ïa ka burom jong ka Jaiñtia Hills kumba ka la sei ha ki snem kiba mynshwa ïa ki briew kiba tbit, ban ïadon bynta ban saiñdur thymmai ïa ka ri bad ka jaidbynriew.
Une u nongïalam u la pynshai ruh ïa ki paidbah da kaba ong, wat sngewthuh bakla ban ong ba sha Delhi yn leh aïu ban phah da u Prah marwei bad yn phah noh da ka Congress namar ka dei ka seng kaba bun, hynrei wat nym klet ba ka Congress kumba ka long mynta ka la nang ngam nang ngam, wat kito ki longïing longsem kumjuh ki nongïalam kiba don ha syndah jong ki longïing Gandhi ki la nangmih na kawei ka sngi sha kawei ka sngi bad myn ha kane ka ilekshon ba la dep ki la jop tang kumba 44 ngut ki MP mynta lei kim don jingkyrmen lym da dei ba ka don ka jingïatehlok bad kiwei pat ki seng.
“Ki jaidbynriew ha ka pyrthei ki ïakhun ki ïaksaid ban pynpaw ïa la ka jong ka durkhmat bad ïa la ka jong ka jaidbynriew, ngi ruh ngin ïeng rangbah lyngba ka VPP ban pynpaw ïa la ka jong ka jaidbynriew hapoh Delhi, ngin phah ïa u briew na ka seng trai ri u ban kren ïa ki jingeh jong ka jaidbynriew bad ka jylla khnang ban wanrah ïa kata ka nam ka burom na ka bynta ki longdien mandien,” la ong u Bah Ardent.
