Shillong, Lber 04
Ka jingbym thung nonghikai ka sorkar jylla lajan 3 snem ha ki skul SSA ha kylleng ka jylla Meghalaya ka la wanrah ïa ka jingkiew kaba jur ha ka liang ka jingpep skul shiteng por jong ki khynnah bad ka la ktah shikatdei eh ruh ïa ka pule puthi jong ki khynnah skul kiba pule ha kito ki skul.
Ka Meghalaya Sarva Shiksha Abhiyan School Association (MSSASA) Central Body hapoh ka jingïalam jong u Bah Aristotle C. Rymbai kum u President ka synjuk, ha ka 4 tarik u Lber 2024 ka la leit ban ïakynduh ïa u State Project Director jong ka Samagra Shiksha, u Swapnil Tembe uba dei ruh u Director jong ka School Education and Literacy jong ka sorkar jylla halor ka jingpynkynmaw ïa u ba dei ban thungkam noh ïa shibun tylli ki kam nonghikai kiba lait thylli hapoh ki skul SSA kata ha ka Lower Primary bad Upper Primary.
Haba kren sha ki lad pathai khubor ha Shillong Press Club hadien ka jingwan ïakynduh ïa u Swapnil Tembe, u Bah Rymbai u la ïathuh ba kitei ki kam ki lah lait thylli naduh u snem 2021 ter-ter tad haduh kine ki sngi. Kine ki kam kiba lait ki dei namar ka jingiehnoh kam ki nonghikai bad ka jingdon ki nonghikai kiba la khlad noh.
“Mynta ka la kot sha ki 3 snem bad na ka liang ka Association, ngi ïohi ba ka la ktah shikatdei eh ïa kito ki skul ki bym don nonghikai”, la ong u Bah Rymbai.
U Bah Rymbai u la ong ba ha ki snem kiba la dep, ka jingwan rung skul jong ki khynnah ha ki skul SSA ka la kiew bha hynrei namar ka jingbym thung pat jong ka sorkar ïa ki nonghikai ha ki jaka bathylli ka la wanrah pynban ïa ka jinghiar jong ki khynnah kiba wan rung skul ha kitei ki skul SSA.
“Ngi lah wan shakhmat ban buh ka jingkyrpad ïa ka sorkar lyngba u State Project Director ba u dei ban thung noh ïa kine ki kam thylli khnang ba kito ki khynnah kiba leit pule ha kito ki skul kin nym shah ktah ha ka pule ka puthi ka jong ki”, la ong u Bah Rymbai.
Ka MSSASA ka la kyrpad ruh na ka sorkar ba ka dei ban leh eiei ruh ïa kito ki skul kiba la duna palat ki khynnah pule ha kaba ki la don ki skul SSA mynta hapoh ka jylla kaba ki khynnah pule skul kim don shuh bad ba ka sorkar ka dei ban thung nonghikai noh kham kloi ha kitei ki jaka bathylli. Shuh shuh na ka liang ka synjuk kan sa leit ruh ban ïakynduh ïa u Myntri ka tnad pule puthi ka sorkar jylla, u Rakkam A. Sangma ban kham ïoh ïa ka jingpynshai kaba bniah halor kane ka mat.
U Bah Rymbai u la ong ba ka synjuk ka la kyrpad ruh na ka sorkar ba kan khmih lem ha kaba ïadei bad ka jingdawa ban pynkynriah kam noh ïa ki 12,541 ngut ki nonghikai skul SSA na ka State Implementation Society sha ka tnad pule puthi katkum ki kyndon jong ka Right To Education Act bad ka SSA kiba don hapoh ka jingbei tyngka da ka Samagra Shiksha Abhiyan jong ka sorkar jylla.
U Bah Aristotle u la ïathuh ba ka synjuk ka la phah jingthoh ruh sha ka Chairperson jong ka Meghalaya State Education Commission, ka Professor Sherwin May Sungoh. Na ka liang u State Project Director u la ai ka jingkular ba un sa shim khia bad ïakren bad ka sorkar halor kane ka kam.
