Shillong, Lber 04
Ka Churchill Brothers ka la lah ban pynliem noh ïa ka Shillong Lajong FC da 2-0 kol ha ka ka lympung ïalehkai I-League bad kane ka la wan lyngba ka kol ba khatduh ba la thep da u Martin Chaves.
Ha kane ka jingïakhun kaba la long ha ka lah sngi U Blei ha Tilak Maidan, kine ki kynhun ki la hap ban ïalehkai sa tang mar shiphew ngut ki rangïalehkai hadien ba u Rinaldkydon Lyngdoh Nonglait bad u Lamgoulen Hangshing ki la shah sei da ka red card ha u rephri ha ka minit kaba 68.
Haba phai sha kane ka jingïakhun baroh ar ki kynhun ki la pyrshang ban ïakhun tyngeh, hynrei ka Churchill ka la ioh ban pynkhih jar nyngkong eh lyngba ua Stendly Teotonio Fernandes ha ka minit kaba 15.
Hashwa ba kut ka jingïalehkai jong ka kylla step, u Phrangki Buam u la lah ban pynphai kylla na ka bynta ka Lajong ha ka minit kaba 42 na ka bynta ban ïakhaid mar shi kol.
Watla kine ki kynhun ki la ïai bteng ban ïakhun tyngeh ha ka kylla miet, hynrei hashwa ban wai ka Churchill ka la lah ban thep sa shi kol lyngba ua Martin ha ka minit kaba 80. Watla ka Lajong ka la ïakhun tyngeh ban ioh pynphai, hynrei haduh kaba kut ka jingïalehkai kam shym la lah ban pynurlong bad ka la mad ïa ka jingshah rem kaba san ha kane ka lympung.
Lyngba kane ka jingshah rem ka Lajong ka dangïai sah ha ka kyrdan ba hynriew da kaba kamai 26 na ki khadhynñiew sien ïakhun, katba ka Churchill Borthers ka la jam sha ka kyrdan ba khyndai bad kamai 20 point.
Te kumta ka Lajong kan leit sha Mizoram na ka bynta ban ïakhun pyrshah ïa ka Aizawl FC ha ka 9 tarik mynta u bnai.
