Lucknow, Lber:
Ki la don saw ngut ki briew kiba la ïap ha la ki jong ki jaka na ka daw ba shah pom pyrthat ha Uttar Pradesh ha ka Sngi U Blei naba ka jinghap jong u slap bad u phria ka la ktah jur ïa kiba bun ki bynta jong ka jylla, la ïathuh u heh sorkar.
U Relief Commissioner Naveen Kumar u la ong ba la ïoh jingtip halor kane ka jingïap jong kine ki briew na Lakhimpur Kheri, Hardoi, Sitapur bad Shahjahanpur.
U Myntri Rangbah jong ka jylla u Yogi Adityanath, kumba la ïathuh ka kyrwoh ba la wan na ka sorkar, u la pynpaw ka jingsngewsih halor ka jingduh noh jong kine ki mynsiem briew na ka daw ka jingshah pom pyrthat ha kiba bun ki distrik jong ka jylla bad u la ong ba un sa phah ka jingïarap pisa kaba kyrkieh mar ` 4 lak sha ki longïing kiba la ngat ha katei apot.
U Adityanath u la hukum ïa ki District Magistrate kiba dei khmih ïa kine ki jaka ba ki la dei ban pynbiang ka jingïarap pisa kaba kyrkieh sha kine ki briew kiba la shah ktah jur na ki jingjia halor ka jingduh noh jong ki ïa ki jingri, ka jingshah pynjulor ki ïing ki sem na ki jingshah pom pyrthat, ka jinghap phria, ka jinghap slap bajur, ka ‘erïong bad kiwei pat, la ong shuh shuh ka jingthoh.
U Relief Commissioner u la ong ba ka Farrukhabad, Kannauj, Muzaffarnagar, Jalaun, Jhansi, Kanpur Dehat, Shahjahanpur, Lalitpur bad Saharanpur ki la shah ktah jur na ka jinghap jong u phria hapdeng ka por 8:30 mynstep bad 2:30 noh phai sngi.
Ka jinghap slap ka la long ruh ha ki bynta jong ka Ayodhya, Azamgarh, Badaun, Baghpat, Bahraich, Balrampur, Bareilly, Deoria, Etah, Gonda, Gorakhpur, Hardoi, Kanpur Nagar, Rampur, Sambhal, Sant Kabir Nagar, Bhadohi, Shravasti, Sitapur, Sonbhadra, Sultanpur, Unnao, Varanasi, Lakhimpur Kheri, Lucknow, Mainpuri, Mathura, Mau bad Rae Bareli distrik, la ong u Kumar.
U la ong shuh shuh ba la ïoh jingtip ruh ba ka la don ka jingkhyllem jong ka ïing namar ka jingjur slap palat ha Mathura, ha kaba u nongpynïaid shnong u la pynlong ïa ka jingtohkit bniah. Nalor kane la ïoh jingtip ruh ba ki la don ki ïing kiba la julor na ka jingshah pom pyrthat ha Saharanpur distrik, la bynrap shuh shuh u Kumar.
