Mississippi, Lber:
Katkum ki khubor la ong ba kawei ka longkmie ka la duh noh ia la ka jingim bad kumba 12 ngut kiwei pat ki la mynsaw jur na ka jingïasiat hapoh ka jaka leh kmen ‘Club’ kaba don ha West Point hapoh Mississippi jong ka United States ha ka Sngi U Blei.
U heh ka Clay County Sherif- u Eddie Scott u la iathuh ba katei ka jingjia ka la long ha ka step pyrngap jong ka Sngi U Blei hapoh katei ka jaka leh kmen kaba la ju tip kum ka ‘Club Oasis’ bad la ong ba ha ka por ba ki pulit bad ki bor pyniaid ki leit poi sha katei ka jaka ha katei ka step, ki shem ia katei ka longkmie kaba la kyllon iap bad ia kitei ki 12 ngut pat kiba la mynsaw ha katei ka jing iasynreit kuli.
Napdeng kitei ki 12 ngut kiba mynsaw, ki don kiba mynsaw malu- mala bad don pat ruh kiba la mynsaw jur bad kiba la don hathmier ka jingïap, ha kaba uwei na kitei kiba shah siat u dei uba shah siat syndon na ka dur khmat.
Na ka liang ki bor pyniaid jong katei ka jaka leh kmen, ki la iathuh ba 90% na kito kiba leit sha katei ka jingïaleh kmen ki dei kiba nabar katei ka thaiñ. Hynrei kaba sngew lyngngoh ka long ba kumno ki nongap pahara hapoh jong katei ka jaka leh kmen kim shym lap ia kitei ki tiar siat ba la wanrah da ki nongleit sha katei ka jaka leh kmen.
Haba iakren bad ki lad pathai khubor, u nongap pahara jong katei ka jaka u la iathuh ba um shym la tip eiei ia ka jingjia hapoh jong katei ka jaka hynrei tang mar ia ïohsngew bad bna ia kata, u la iohi ia utei u suba don kti ha katei ka jingsynreit kuli bad u la leit beh kthong ia u shaduh ka jaka pynieng kali bad sha ki surok bah ‘Four Lane’ jong katei ka thaiñ haduh ba utei u nongsiat un da phet bad jah rngai noh sha ki bynta khlaw jong katei ka nongbah.
