Chennai, Lber:
U General Secretary jong ka AIADMK u Edappadi K Palaniswami ha ka Sngi U Blei u la kyntu ïa ki samla ba ki la dei ban kiar na u drok naba ka jingpyndonkam ïa u khlem da tip shaphang ki jingktah kan sa ïalam sha ka jingbuh jingeh ha ki sngi ban wan.
Ha ka durkhih jong ka jingïakren bad ki samla, u Palaniswami u la kren ha kaba ïadei bad ka jingïai bteng ha ka jingïoh kurup ïa ki song jingdih pynbuaid ha kiba bun ki bynta jong ka Tamil Nadu.
“Nga buh ka jingkyrpad sha baroh ki kmie ki kpa ba ki la dei ban batai bha sha ki khun jong ki halor ka jingma kiba ap na ka jingdih drok bad ban pynsngewthuh sha ki halor ka bynta jong ka jingma jong u,” la ong u Palaniswami.
Kum ka jingpynkynmaw halor ka jingdonkti jong u Jaffar Sadiq uba na ka seng DMK ha ka kam khaïi drok ha kylleng ki ri ka pyrthei, u Palaniswami u la ong ba ha ki 2 snem shiteng ba la leit, u la long tang ma u hi uba la kren shaphang ka jingsniew jong u drok uba la ktah ïa ki samla.
“Kiba ju shah ktah bha ha u drok ki dei ki khynnah pule ha ki skul bad ki kolej bad kumjuh ki IT Professional. Kum ki kmie ki kpa, ngi donkam ban pyrkhat shaphang kane ka jingeh. Tang ha ka Sngi Saitjaiñ, la ïoh ban kurup ïa u drok ba shongdor ` 180 klur ïa uba la ïoh ban kurup na Madurai, Ulundurpet bad Chennai.
