Jowai, Lber 04
U nongïalam ka VPP ha ka jinghiar sha sor Jowai, u la thalaiñ kylla ïa u MLA ka Jowai, Bah Wailadmiki Shylla halor ka jingkynthoh jong u ba ki MLA VPP kim lait ang hapoh dorbar.
“Sngew sammut ba kat u MLA jong phi uba phi la sei na ka sor bah Jowai un dang kren ïa ki kyntien ba wat u khyllung ruh um ngeit shuh, ban ong ba kita ki MLA jong ka VPP ki khlem kren eiei hapoh Assembly,” la ong u Bah Ardent.
Ïa kane u Bah Ardent u la kren ha ka jingïalang pynshai paidbah ïa ki nongrim ka VPP bad ka thong na ka bynta ka Jylla bad ruh ban pan jingkyrshan na ka bynta u kyrtong MP Lok Sabha ka VPP u Dr. Ricky AJ Syngkon ha ka jingïalang kaba la long ha Seiñraij Complex, Ïawmusiang hakhmat ka DC ophis haka 4 tarik Lber.
Haba bteng shuh shuh ïa ka jingkren, u Bah Ardent u la ong, “Wat nym dom ïoh phi ong ba nga kren tohmet ïa u MLA u jong phi, hynrei sngew sammut ba kat u MLA jong phi uba phi la sei na ka sor bah Jowai un dang kren ïa ki kyntien ba wat u khunlung ruh um ngeit shuh, ban ong ba kita ki MLA jong ka VPP ki khlem kren eiei hapoh Assembly, ngam tip u MLA jong phi u dang ruma sha ka pyrthei sngi aïu tip”, la ong u Bah Ardent.
U la bynrap ba ki paidbah ki la tip bad ïohi lut aiu ka VPP ka kren bad kito ki Myntri kiba ju padiah bha mynshwa mynta ki hap ban pule kot haba rung ki MLA jong ka Voice of the People Party.
“Ngim ju kren biej bad kum ki MLA ngi kren ïa kaba ngi tip bad ngim pynlehrain ïa ki nongkyrshan”, la ong u Bah Ardent.
