Beijing, Lber:
Ka China ha ka Lah Sngi U Blei ka la ong ba ka don ka jingkyrmen kaba skhem ba ka jingiadei hapdeng jongka bad ka United States kan ym synjor ne thut noh wat lada ka ilekshon President ka ban long ha une u Naiwieng kan wanrah jingkylla ia ka jinglong-jingman bad ka synshar- khadar hapoh US. Hynrei u la ong ba ka jingiadei hapdeng ka US bad ka China pat ka dei hi ban neh kumjuh.
Namar la iohi ba ka China bad ka US ha kine ki snem ba la leit, ka la sdang ban iapher jingmut bad iakynad khamtam haba iadei bad ka Taiwan, kaba long ka ri dew lynnong ba ka China ka ju kam trai na ka por sha ka por ba katei ka ri dew lynnong ka dei ka bynta ba pait na ka China bad kan sa leh ia kaba donkam ban pyniasoh biang ia katei ka dew lynnong sha lade ha kano kano ruh ka por bym lah ban tip.
Kumba la dep ban pynbeit ruh la ong ba ka US kan pynlong ia ka ilekshon ban jied President ba thymmai ha u Naiwieng 2024 ha kaba u nongialam barim ka US u Donald Trump ruh u la rai ban iakhun pyrshah ia u President ba mynta jong ka US- u Joe Biden ban ioh knieh biang ia katei ka shuki kaba u la duh noh ha kine ki khyndiat snem ba la leit. Kumta, la ong ba haba ki lad pathai khubor ki kylli shaphang ka jingiadei jong ka China bad ka US hadien jong katei ka ilekshon President ka ban sa long ha une hi u snem, u nongrah ktien ka China u la ong ba ka China kam don bynta eiei halor katei ka jingjied President lane ka jing kylliang President ha US. Wat lada ki nong-ialam kin dei kijuh ne ki don jingkylla ruh, katba ka jingiadei hapdeng ka China bad ka US kan ïai neh kumjuh bad baroh arliang kin iatrei lang bad ia kyrshan markylliang kumba ju long baroh shi katta.
Ha kajuh ruh ka por, na ka liang ka China ka la ong ba kham pher lada uno- uno ruh u nongialam un ioh bat ia katei ka shuki President ba thymmai jong ka ri United States, hynrei ka China ka kyrmen skhem ba kitei ki nong-ialam kin long kiba kloi ban iatrei lang bad ba ka China bad ba kin nang bteng bad pynskhem shuh shuh ia ka jingiadei hapdeng ka US bad ka China.
