Jowai, Lber 04
Kiwei ki seng haba ïalap ilekshon kim ïakren eiei shuh, ki ïakren pynban ïa ka jingrwai Prah, la ong u nongïalam ka VPP u Bah Ardent M Basaïawmoit ha ka jingïalang paidbah kaba la long ha Seiñraij Complex, Iawmusiang hakmat ka DC ophis 4 tarik Lber.
Une u nongïalam u pynpaw ïa ka jingkyrmen ba ka jingïashim bynta jong ki paidbah ha ki jingïalang bapher bapher ba la pynlong da ka VPP kam dei tang ban sngap ne peit ïa u Bah Ardent hynrei namar ka don ka jingkhih, ka jingpluh bad ka jinging hapoh ka mynsiem kat haduh ba ka la pynlong ïa kiwei ki seng haba ïalap ilekshon ban kren ïa ka jingrwai Prah.
“Ngi ngim ju don por ban ïakren ïa kiwei ki jingrwai jong kiwei ki seng, hynrei ki seng mynta ki ïakren pynban ïa ka jingrwai Prah bad ki mut ba u paidbah u shu leh shongshit ïa kata ka jingrwai, ki bakla kine kiwei ki paralok, la ong u Bah Ardent.
U la ong ruh kine ki paralok kim ïohi ba ka don ka kti kaba na sha lyndet kaba kum ka seng ka shaniah tylli kata ha U Blei. “Ngi duwai man ka sngi bad ngim don da kawei ka jingmut jingpyrkhat ban pynriewspah ne pynmyntoi ïalade hynrei ngi kwah ba ki paidbah kin ailad ïa ka VPP ban wanrah ïa kata ka synshar khadar kaba khuid kaba suba hapoh ka Jylla,” u la ong.
