Shillong, Lber 04
Ki ar kol ba la thep da u Phil Foden ki la biang pura ïa ka Manchester City ban wanphai da ka jingjop hadien ba la la lah ban pynliem noh ïa ka Manchester United da 3-1 kol bad ka la nangjan ban kynjoh biang sha ka thong ha ka Premier League.
Kane ka nam jop ka la pynlong ïa ka City (62 point) ba kan duna sa tang shi point ïa ka Liverpool (63 point), kaba dangbat ïa ka kyrdan ba hakhlieh.
U Erling Haaland u la lah ban pynurlong ïa ka kol kaba khatduh hashwa ban wai hashwa ba ka City kan leit sha Liverpool mynta ka taiew bad ban ïaknieh na ka bynta ban lamkhmat ha kane ka lympung.
Tang mar ïasdang kane ka jingïalehkai kaba la long ha Etihad Stadium, ka United ka la ïoh ban pynkhih jar nyngkong eh lyngba u Marcus Rashford ha ka minit kaba 8. Hashwa ban kut ka jingïalehkai jong ka kylla step u Haaland u la pynlehnohei ïa ka kabu ksiar.
Hynrei hadien shiphew minit ba la bteng ïa ka jingïakhun jong ka kylla miet u Foden u la lah ban pynurlong na ka bynta ka City na ka bynta ban ïakhaid mar shi kol. U Haaland u la pynlehnohei biang sa shisien ïa ka kabu ksiar ha kane ka jingïalehkai ‘derby’ jong ka Premier League.
U Foden u la ïoh ban thep biang ïa ka kol kaba ar ka jong u ha ka minit kaba 80. Hashwa ban wai artad u Haaland u la lah ban pynurlong ïa ka kol ka jong u na ka bynta ka City ban khur syndon ïa ka jingjop.
Lyngba kane ka jingshah rem kaba khadwei ha kane ka aïom ka la pynlong ia ka United hapoh ka jingïalam u Erik ten Hag ba kan dangduna haduh 11 point na ka bynta ban ïoh rung sha ka thup kaba saw ha kane ka lympung bad ka dangsah ruh sa khadwei sien ïakhun.
