Shillong, Lber 04
Ki pulit ka Jylla ki ithuh tang ar tylli ki kyntien haba ïadei bad ki seng lehnoh, ka kyntien ‘pyndem’ lada ki dkhot ne nongïalam jong ki seng lehnoh ki pyndem ban wanphai noh sha ka imlang sahlang, bad ka kyntien ‘shahkem’ lada kino-kino ki dkhot jong ki seng lehnoh ki shahkem namar kino-kino ki kam be-aiñ.
Ki pulit ka Jylla ki la ong ba ka don tang ka policy na ka bynta ki seng lehnoh khamtam lada ki dkhot ki wan pyndem. Hynrei ïa kiba shahkem namar ki kam runar bad kam be-aiñ ka don da kawei pat ka aiñ kumno ban leh.
“Ka aiñ ka don la ka jong na ka bynta kiba wan pyndem ban don noh ha ka imlang sahlang, bad ka aiñ ka don ruh la ka jong na ka bynta kiba shahkem,” la ong ki heh pulit haba pynpaw halor ki dkhot ka Hynñiewtrep National Liberation Council (HNLC) kiba pyndonkam ïa ka kyntien ‘shongthait’ haba ki wanphai sha ka imlang sahlang.
Ki don ki dkhot ka HNLC kiba pyndonkam da ka kyntien shongthait haba ki mih noh na ka seng bad kim ïaid katkum ki kyndon aiñ haba ki wanphai sha ka imlang sahlang. Kum ban pynkynmaw, ha ka por jong u General Secretary barim ka HNLC u Bah Cherishstarfield Thangkhiew, u la wanphai sha ka imlang sahlang, u khlem ong ba u wan pyndem ha ki bor jong ka aiñ, hynrei u la ong ba un shongthait noh na ka seng.
Kumjuh ruh u Vice Chairman ka HNLC u Sufiyan A. Hazarika uba tip kum u Manbhalang Jyrwa u la kam ba u la iehnoh ïa ka seng hynrei u khlem wan pyndem hakhmat ki briew jong ka aiñ.
Kumta ha ka jaka jong utei Vice Chairman barim, ka HNLC ka la pynbna ba la thung bujli da u Teimiki Laloo kum u Vice Chairman bathymmai.
Ki dkhot jong kano-kano ka seng lehnoh haba ki wan ban pyndem, la ju pynsah ruh ïa ki katto-katne bnai kum ka jingpynbeit ïa ka jingim lyngba ki jinghikai bad pyni lynti haba wanphai sha ka imlang sahlang. Hynrei ym lah ban tip kumno ki leh kita ki dkhot jong ki seng lehnoh kiba shu shongthait la ka kyndon jong ka aiñ ka shah ne em ban leh kumta bad kaei ki dei ban leh haba ki iehnoh ïa ka seng lehnoh ban wanphai sha ka imlang sahlang.
Haduh mynta kam shai satia kumno ki pulit kin leh ïa ki dkhot jong ki seng lehnoh kiba wanphai sha ka imlang sahlang da kaba shu shongthait na ka seng, ym ba ki wan pyndem ha ki briew jong ka aiñ.
Ka don ruh ka jingkam ba u dkhot ka HNLC uba shahkem u dei uba ‘thmu pyndem’ kaba la nang pynkulmar shuh shuh namar ki dkhot jong ki seng lehnoh kiba thmu ban pyndem, ki ïaid katkum ki kyndon ha kaba ka ju don ka jingpynbeit lypa lada don kum kata ka jingthmu.
