Shillong, Lber 04
Ki pulit jong ka Ri-Bhoi District ha ka miet Sngi U Blei ki la ïoh ban kurup u kynja (Ganja) uba khia haduh 4750 kilo bad uba shongdor T.20 klur na Lad Umsaw ha Ri-Bhoi.
Ka jingïoh kurup ïa utei u ganja ka la long hadien ba ki la ïoh ïa ka jingtip kaba bniah na ka tnat syntiat halor ka jingdon jong kawei ka trok kaba kit ïa ki mar beaiñ. Kumta ka la pynlong ïa ka jingap shrip ha Lad Umsaw ryngkat ka jingïatreilang bad ki pulit CRPF jong ka 67 Battalion.
Hadien ba la ïoh bat ïa kane ka trok kaba don ïa u number NL01-AH-5853, la pynlong ïa ka jingtalasi ïa kane ka trok katkum ki kyndon ka Narcotic Drugs and Psychotropic Substances Act, 1985, ryngkat ka jingdonlang ki nongsakhi, ha kaba ki pulit ki la ïoh kurup 280 song u Ganja uba don ha ka jingkhia 4,746.409 kilo bad shongdor T.20 klur.
Kane ka jingtalasi kali ka dei ruh halor ka jingpynkhlaiñ ïa ki bor pahara namar ka jingnang jan jong ka ilekshon MP Lok Sabha.
U Superintendent of Police ka Ri-Bhoi District u Jagpal Singh Dhanoa ha ka kyrwoh ba la phah sha ki lad pathai khubor u la ong, hadien ba la kurup ïa u Ganja, ki pulit ki la kem noh ïa u Babulal Sheikh uba 48 snem na ka Jylla Maharashtra bad la kurup ruh ïa kawei ka Mobile Phone Nokia bad ka Sim Card Airtel bad ka pisa kaba T.3,760 na ka met jong utei briew.
Ha kaba ïadei bad kane ka jingjia, ki pulit ki la pynrung mukotkuma hapoh ki kyndon jong ka Narcotic Drugs and Psychotropic Substances Act, 1985 ha thanat Umïam bad ka jingtohkit ka la ïaid shakhmat ban lap ksai ïa kiba donkti ha kane ka kam.
