Nongstoiñ, Lber 04
Ki bahaïing jong u samla Mcbornbonnyson Kharbani uba la duh noh la ka jingim hadien ba la suba ba u la shah dung dusmon ha ka miet shiteng synñia jong ka 3 tarik mynta u bnai, ki la ong ba nalor uwei ba la shah kem, ki suba jur ba ki don sa 3 ngut ki runar kiba donkti ha kane ka kam.
Ki bahaïing ki la ong ba kum ka Kur kin hap ban leh tyngeh ban nym ailad shuh ïa kum kine ki jingjia ba kin dang ïai jia bad ong ba ka jingsuba jur ba ki dang don sa lai ngut kiwei pat ka long kumba la ïohsngew da ka jingïathuh jong utei u samla ha ka por ba u phone sha ki.
Ki la ong ruh ba ha ka jingsngewthuh ki bahaïing, utei u samla um shym la don daw badno-badno. Ki la ïathuh ba utei u samla u dei uba kamai kali tourist Nongstoiñ-Shillong. Nangta, ha katei ka por ba jia, utei u samla u dang wan jingwan bad u dang thmu ban wan noh sha ïing hynrei mar ïa poi ha katei ka jaka, ki runar ki la khang lynti ïa u ban wad daw ban kynroi.
Ki bahaïing ki la ïathuh ruh ba ha katei ka miet haba ki la thiah, ki la ïoh ka phone call, kaba ong ba wan ba don ki briew kiba sdang ban kynroi ïa u khlem daw bad ki don saw ngut. Haba u mut ban leit phai sha ïing, bad haba kylli la u ithuh ne em, u ong em bad ka kali pat ka dei ka rong saw hynrei um ithuh ïa kata ka kali ruh. Ha mar kata ka por ba u dang ïathuh kumta lyngba ka phone ki la ïoh sngew ruh ïa ki jingïania bad timsih timsang jong kita briew kiba la kylli ruh ïa u ba u dei ne em uta ba ki wad ma ki ha kaba u la jubab ruh da kaba ong ba um dei.
Shuh shuh, na ka liang ki bahaïing ki la ong ba ki la kynmaw liak ba ki don kiba shna kali ar ngut kiba sah kham shaneng, kumta ki la phone ïa ki bad ong ïa ki ba kin leit sha katei ka jaka ba ki don ki briew kiba kynroi ïa utei u samla, ha kaba ma ki, kin sa nang wan nadien.
La ong ba kitei ki nongshna kali ruh ki la leit sha katei ka jaka bad ki la ïohi ba ki don ki briew kiba kynroi, bad mar kumta hi, la wan biang ka phone call kaba ong wan wan kine ki briew ki wan kynroi leh aïu ïa nga. Mar kumta ki bahaïing ruh ki la ïaleh ban pynkloi bad tad ynda la poi sha surok ki la ïoh ban shong noh da ka kali bad hadien ba la poi ha katei ka jaka la lap ba u samla u la thiah lyngktar ha surok ha ryngkat ka jingmynsaw bad phlei snam na ki bynta ka shadem bad u la khlad noh ha katei hi ka jaka tang hadien katto-katne por.
Ha kaba ïadei bad kane ka jingjia, na ka liang ki bahaïing jong utei u samla ki la dep ban buh ruh da ka jingujor ha thanat Nongstoiñ.
Lah ban kdew ba u Mcbornbonnyson Kharbani, 28 snem tam na ka shnong Pathew, Parïong ha Eastern West Khasi Hills bad uba sah pat ha ka dong Block-III lane dong IB ha Upper New Nongstoiñ u la duh noh la ka jingim hadien ba la suba jur ba u la shah pynïap dusmon ha ki runar.
La ong ba katei ka jingjia ka la jia ha ka miet shiteng synñia jong ka 3 tarik u Lber, 2024 ha ka por kumba 12:15 hapoh ka jaka ïeng kali ha taxi stand Kynroh kaba don hapoh ka sor Nongstoiñ.
Shuh shuh hadien katei ka jingjia, la pynkit noh ïa u sha Civil Hospital Nongstoiñ hynrei u la khlad noh ha kaba na ka liang ki doktor ki la pynbna ba u la khlad lypa sha ban poi sha jaka sumar.
Na ka liang ki pulit ki la ïoh ban kem noh ïa u suba donkti ba la tip kum u Medius Mawlot na ka shnong Mawkaton bad na ka liang ki pulit ki la pynrung mukotduma bad ka jingtohkit mynta ka dang ïaid shakhmat.
Yn deng lama ïong ka JAC halor ka jingshah pynïap u samla, dawa pynshitom ïa kiba donkti
Ki nongñiah kali tourist Nongstoiñ kiba don hapoh ka synjuk jong ka Joint Action Committee Nongstoiñ Tourist Associations ka la pynrem jur ïa ka jingshim jubor jong ki runar ïa ka jingim u para nongñiah kali kaba la jia ha ka meit shiteng synñia jong ka 3 tarik u Lber 2024 ha kawei na ki jaka ïeng kali lane ka stand taxi sha Kynroh kaba don hapoh ka sor Nongstoiñ.
U Bah Richard Sun Chairman ka JAC Nongstoiñ Tourist Association haba kren ha ki lad pathai khubor u la ong ba ngi pynrem jur ïa ka jingshim jubor jong ki runar ïa ka jingim u para nongñiah kali.
Shuh shuh u la ong ruh, ka JAC ka la rai ban deng lama ïong kumba ar sngi kynthih kum ka dak jong ka jingsngewsih bad ka seng ka dawa ruh na ki bor jong ka aiñ ba kan pynshitom jur ïa kiba donkti namar la ong ba kat ban shim noh ïa ka jingim jong u ne ka briew kam long kaba bha.
