Shillong, Lber 04
Ka eksamin Secondary School Leaving Certificate (SSLC) ba la pynlong da ka Meghalaya Board of School Education (MBoSE) ha ka Lah Sngi U Blei ka la long kaba ïaid beit ïaid ryntih khlem kano-kano ka jingpynthut.
Ki don 55, 189 ngut ki khynnah pule kiba ïakhun ïa ka eksamin SSLC mynta u snem.
Ki bor pynïaid ka MBoSE ki la ïathuh ba na kitei 55 hajar tam, 31, 940 ngut ki kynthup ïa ki kynthei bad 23, 249 ngut ki shynrang.
Ha kajuh ka por, haba phai sha ki jaka thoh eksam ba la pynkhreh na bynta ka SSLC, ki don 159 tylli kiba saphriang ha kylleng ka Jylla.
Na kitei, kiba bun ki don ha ‘Shillong Region’ – 91 tylli katba 68 tylli kiwei pat ki hap hapoh ka ‘Tura Region’.
Haba phai pat sha ka eksamin HSSLC kaba la sdang ha ka Sngi Thohdieng, ki don 34, 335 ngut ki khynnah pule kiba ïakhun ïa ka eksamin.
Ha ka tnad pule ‘Science’, ki don 3812 ngut ki khynnah pule kiba ïakhun ïa eksam katba ha ka tnad pule ‘Commerce’, ki don 2440 ngut. Haba phai sha ka tnad pule ‘Arts’, ki khynnah pule kiba ïakhun ïa ka eksamin ki don 28, 072 ngut bad 11 ngut ha ka tnad pule ‘Vocational’.
Ki don ruh 108 tylli ki jaka thoh eksam ba la pynkhreh na bynta ka HSSLC ba kynthup ïa 67 tylli ha ‘Shillong Region’ bad 41 tylli ha ‘Tura Region’.
Na ka liang ki bor pynïaid ka MBoSE ki la bthah ïa ki ophisar ha man la ki jaka thoh eksam ban khmih bniah na bynta ka jingïaid beit ïaid ryntih jong ka eksamin.
