Chennai, Lber:
Ar tylli ki skul kiba don ha Tamil Nadu ki la ïoh ïa ka khubor shah byrngem pynbthei bom, ha kaba kane ka la buh jingma bad pyntieng pynsyier ïa ki khynnah skul, ki nonghikai bad ki kmie ki kpa jong ki khynnah skul.
Ïa kine ki skul la tip kyrteng kum ka PSBB Millennium School kaba don ha Coimbatore bad kawei pat ka skul jong ki riewshimet kaba don ha Kancheepuram distrik. Katba ka PSBB Millennium School ka la ïohpdiang ïa ka Email ha ka miet jong ka Sngi U Blei, ka la don ka khubor thok ba la phah sha kawei pat ka skul ha ka step jong ka Lah Sngi U Blei, kata hynnin ka sngi.
Hadien ba la ïoh jingtip halor kane, ki pulit bad ka kynhun jong ki pulit pyllip bad pynduhbor ïa u bom mar mar ki la leit sha ka PSBB Millennium School bad sdang ban pynlong ïa ka jingtohkit.
Hynrei ki heh ba dei khmih kim shym lap ïa ki tiar pynbthei. Kawei ka durkhih ba la ring habar ka PSBB Millennium School ka la pyni ba ki pulit ki la kylli jingkylli ïa ki briew, katba ki bos skul pat kiba thylli ki la rung hapoh ka phyllaw jong ka skul.
Ka jingtohkit ka dang ïai bteng ban lapdien mano ba la phah ïa ka Mail bad kumjuh ïa ka khubor thok.
Ka jingkhmih bniah jong ki pulit ha kaba ïadei bad kane ka jingjia ka dang ïai bteng na ka bynta ki khynnah klas 11, ki pulit ki la nang pynkhlaiñ shuh shuh ïa ka jingpyntreikam ban ai jingïada kaba kyrpang na ka bynta kine ki skul.
Haduh mynta ym pat ai jingbit ïano ïano ruh ban rung ha phyllaw jong kine ki skul khlem da shah khmih bniah bha hashwa ba kin rung.
