Shimla, Lber:
Ki la don kumba 81 ngut ki nongjngohkai pyrthei kiba la sahkut lynti ha Spiti Valley kaba don ha Himachal Pradesh namar ka jingkhang jong ki surok na ka daw jong ka jinghap ka ïor ha kaba kine ki la shah pynkynriah noh sha ki jaka ba kham shngaiñ, la ïathuh ki pulit.
Ha kaba ïadei bad kane, ki la don palat 650 tylli ki surok, kynthup ïa san tylli ki surok bah, ha ka jylla kiba la shah khang ban ïaid kali hadien ba la sakhi ba ki la don shibun ki jingtwa jong u thah bad ka khyndew na ka daw ka jingjur slap bad ka jinghap ïor ha kine ki lai sngi ba la leit, la ïathuh ka tyllong khubor.
Ka jingsahkut lynti jong ki 81 ngut ki nongjngohkai pyrthei ha Spiti Valley ha Lahaul bad Spiti distrik ka la long ha ka miet jong ka Sngi U Blei ha kaba ki la shah pynkynriah bad ïoh jaka sah noh ha kiba bun ki ïing basa (hotel) bad ki jaka sah kiba don ha katei ka jaka, la ïathuh ka jingthoh kaba la wan na ki pulit.
Ki kynhun pulit ba dei khmih ki la ïai bteng ban leit pynkhuid ïa ka ïor kaba la tap ïa kiba bun ki surok bad ban pynlait lynti ïa ki jaka bym lait shuh ban ïaid da ki kali ne ban ïaid briew.
Kane ka jingpyntreikam ka dang ïai bteng naba ka jinghap jong ka ïor ruh ka dang bteng haduh ba la thoh ka khubor.
Ki la don kumba 290 tylli ki surok kiba la shah khang lynti ha ka distrik bad kiba bun ki thaiñ ki la ngat ha ka jingbym don ding ilektrik na ka bynta ar sngi, la ong ka jingthoh. ka jinghap jong u slap uba jur bad ryngkat ka ïor ha Lahaul bad Spiti ka la ktah ruh ïa ka Mobile Network, la bynrap shuh shuh ka jingthoh.
Ha ka Sngi U Blei, ka jingtwa jong u thah ka la ktah jur ïa ka Dara Waterfall hajan ka shnong Jasrat ha Lahaul bad Spiti, ha kaba kane ka la khang ïa ka lynti ban poi sha Chenab bad ki thaiñ ba marjan, la ïathuh ki heh pulit.
Ki pulit ki la kyntu ïa ki nongshong shnong jong ki shnong ba marjan jong ka Jobrang, Rapi, Jasrath, Tarand bad Tharot ba kin long kiba husiar bad ba kin ai jingtip ei ei kaba donkam kyrkieh sha ki jaka treikam jong ki pulit kiba don ha marjan ki shnong jong ki.
Ha kaba ïadei bad kane, ka jingkhriat ka dang ïai bteng ha kylleng ka jylla.
