New Delhi, Lber:
U Myntri Rangbah jong ka Delhi u Arvind Kejriwal hynnin ka sngi u la ïaidlait ban leit na ka bynta ka jingshah khot hajir ha ka sien kaba phra hakhmat ka Enforcement Directorate (ED) na ka bynta ban kylli jingkylli bad tohkit ha kaba ïadei bad ka jingshah kynnoh donkti ha ka jingbym pyntreikam hok hapoh ka tnat Excise ha kaba u la buh ka jingtyrwa ba un shu mih hakhmat ka kynhun da kaba ïakren lyngba ka durkhih hadien ka 12 tarik, Lber.
“…U Kejriwal u la jubab ïa ka kynhun ED. Wat lada ki jingkhot hajir ki long kiba beaiñ, u Kejriwal u la long uba la khreh ban ai jubab halor ki jingkylli jong ka kynhun ED lyngba ka jingïakren ha ka durkhih. U la pan ka tarik na ka bynta kane hadien ka 12 tarik, Lber,” la ong ka seng AAP.
Ka seng AAP ka la ïania halor ka jingtehlakam jong ka ïingbishar ha Delhi kaba la wad bniah la u Kejriwal u la leit mih hakhmat ka kynhun tohkit haba u la ïaid lait na ka jingshah khot hajir ha ka sien kaba hynñiew ha ka 26 tarik, Rymphang.
Ka ïadei bad ki jingkhot hajir kumba la pynshisha ba la pynbor da ka seng Bharatiya Janata Party-(BJP) kaba lamkhmat ïa ka sorkar kmie ha kaba ka la leh da ka bor pyrshah ïa ka seng AAP ba kan mih noh na ka kynhun synrop Indian National Developmental Inclusive Alliance (INDIA).
U Kejriwal, uba la ïaidlait na ki jingshah khot hajir ha ka kynhun ED naduh ka 2 tarik, Naiwieng u la ong ba kine ki jingshah khot hajir ki dei kiba beaiñ bad kiba long tang ki jingleh khlieh ha kaba ïadei bad ki kam saiñ pyrthei, ha ka taïew ba la lah u la ong ba un sa leit mih hakhmat ka kynhun tohkit tang lada ki wan ki hukum na ka ïingbishar jong ka Delhi ba un leh kumta.
Ka kynhun tohkit ka la leit sha ka Rouse Avenue Court kaba ha Delhi ha ka 3 tarik, Rymphang pyrshah ïa u Kejriwal uba la ïai ïaidlait na ki jingshah khot hajir. Ka ïingbishar ka la ailad ïa u Kejriwal ba un leit mih markhmat hakhmat kane ka kynhun haduh ka 16 tarik, Lber hadien ba u la leit mih hakhmat ka kynhun lyngba ka durkhih, naba don ka dorbar mang tyngka ha Delhi Assembly.
U nongïalam jong ka seng BJP u Harish Khurana u la ong ba u Kejriwal u la pyrshang ban ïaidlait na ka jingshah tohkit bad shah kylli jingkylli.
“Lada u la pynkhreh ban leit mih hakhmat ka kynhun ED lyngba ka durkhih, balei um lah ban leit mih mynta hakhmat ka kynhun? U la ïaleh ban lait na ka jingshah tohkit ha kaba la paw shai ba u la donkti ha kane ka jingjia,” la ong u Khurana ha ka jingïakren bad ki lad phah khubor.
