Shillong, Lber 04
U Secretary bad President ka Aradonga Dorbar Centre, West Khasi Hills ki la ujor ejahar ha thanat Aradonga halor ka jingkynnoh khaïi dewïong be-aiñ khlem ki ‘challan’ da kaba kam ba ki trok kit dewïong palat pud ki la pynjulor shi kat dei ïa ka ka surok ba dang shna lyngba katei ka thaiñ.
Kitei ki khlieh nongïalam shnong ha ka ejahar ki la ong ba ki trok ki ïaid lyngba ka Riangdo-Athiabari (Meghalaya) haduh Boko (Assam) khlem ki ‘challan’, kaba mut ba la pyndonkam ïa ki khajna ka Jylla katba ki jingkieng bad ka surok ïa mynta ki don hapdeng ka jinglong ba isangsot.
Ïa ka ejahar la ujor ha ka 2 tarik Lber bad ki nongujor ki la dawa da ka jingtohkit ba mardor halor katei ka bynta, ha kajuh ka por ban khang shi syndon ïa katei ka kam shalan be-aiñ.
Ha kawei ka liang, haba la kynjoh ktien, u SP ka WKH, u Bikram D. Marak u la ong ba ka tnad ka dang khmih bniah ïa katei ka kam, hynrei imat kam don ka jingïabiang naba ki nongujor kim kwah wan shakhmat ban batai halor katei ka bynta.
“Kane ka kynthup ïa ka tnad Transport bad shlem treikam ka DMR. Kumta ngi ïatreilang bad ki halor kane bad ka jingtohkit haba ïadei bad kitei ki jingkynnoh ka dang ïaid,” la ong u SP.
