Shillong, Lber 04
Katkum ki jingpynpaw na ki jingsdang tohkit jong ki pulit, la paw ba u Personal Security Officer (PSO) jong ka Hynñiewtrep National Liberation Council (HNLC) u Bah Storgy Lyngdoh uba la shahkem, um shym la rung shapoh Meghalaya da ka jingthmu ban pyndem.
Une u dkhot ka HNLC ba la 41 snem, u la wan rung sha Meghalaya na Bangladesh bad u la shah kem na ka ïingsah lade ha Mawlynrei, Khliehshnong Block-C ha ka step phyrngab jong ka Sngi Saitjaiñ, ka 2 tarik u Lber.
Hadien ba la kem ïa une u dkhot la leit rah hakhmat ka ïingbishar ha kane kajuh ka sngi bad la aibor ïa ki pulit ba kin tohkit haduh 10 sngi.
Ka jingshah kem jong une u dkhot ka HNLC ka la long ruh hadien ba la sdang biang ka jingsam ïa ki shithi dawa pisa sha ki nongkhaïi lyngba ka ‘whatsapp’ ba la pyndonkam da u number na Bangladesh.
Hadien ka jingshah kem ka jong u, la don ka khubor kaba kam ba u Storgy u la wan rung sha Meghalaya na Bangladesh da ka jingthmu ban wan pyndem noh hakhmat ki pulit ka jylla.
Hynrei ka khubor na ki pulit ka la ïathuh ba katkum ka jingtip kaba ki don, une u dkhot ka HNLC um shym la wan satia sha Meghalaya ban pyndem. La ong ruh ba haduh ka por ba u don hapoh ka jylla, um shym la wan pyndem bad ki pulit ruh kim shym la don satia kino- kino ki jingtip ne ki kot ki sla ban ong ba kane ka dei ka jingthmu ka jong u, hynrei u la don hapoh ka jylla hadien ba u la wan rung na Bangladesh.
Ha ka 2 tarik u Lber, u SP ka East Khasi Hills District u Rituraj Ravi, u la ong ba ki pulit ki la ïoh jingtip ba u Storgy u la sam shithi dawa pisa na ka bynta ka HNLC kaba la wanrah ka jingtieng bad syier hapdeng ki nongkhaïi.
