Sa kawei pat ka jingjia shah pynïap ka la paw pyrthei hadien ba u samla Mcbornbonnyson Kharbani u la duh noh ïa la ka jingim ha ka step jong ka 3 tarik Lber, 2024 ha Nongstoiñ. Une u samla uba kamai kali na Nongstoiñ sha Shillong u la shah pynïap ha ki ‘riew bymman bad la kem ïa uwei katba ki bahaïing ki la suba jur ba dang don sa lai ngut kiwei pat kiba la donkti lang ha kane ka kam be-aiñ. Wat la ïa ka daw tynrai halor ka jingshah pynïap jong une u samla kam pat shai, hynrei ka pyni ïa ka jingbym don dor shuh ka jingim briew. La shu ïa pynïap khlem jingsalia. Kane ka jingjia ka wan ruh hadien katto-katne sngi ba uwei u heprit ba dang 10 snem ka rta na ka shnong Umtyngar ha ka thaiñ Patharkhmah, Ri-Bhoi, u la shah pynïap tang namar ka jingkynnoh ba u la shim ïa u bilor kyiad.
Kiba kum kine ki jingjia ki pyni ba kiba donkti ha kine ki jait kam, kim don shuh ka jingïatiplem ne jingsngewthuh ne jingsngew synei ïa la ki jong ki para briew. Kim tieng ïa ka aiñ ka kanun. Kim shlan ban leit ujor sha ki pulit lada ki lap ba kita kiba ki la pynïap ki la leh bakla eiei pyrshah ïa ki. Ki shim beit ïa ka jingim jong ki im-im peit-peit khlem jingsalia. Kane ka jinglong jong ki katto katne ka pyntriem shikatdei. Balei hap ban da pynïap haba mano-mano ruh kim don hok satia ban leh kumta? Kumno kim don ka jingsheptieng ïa kaei ka ban jia ïa ki hadien habud? Kumno kim buh shwa ïalade ha ka jaka jong uto uba ki pynïap khnang ba kin ym shlan ban leh ïa ka kam bymman? Balei ki la ïa shlan ban thom ïa ka sang ka ma? Hato ka dei ka jingtlot jong ka aiñ? Hato ka dei namar ka jingïatiplem, burom ka akor, mynsiem pyrkhat ïa kiwei ki la ïap lut?
Kiba pynïap briew ki la duk ha ka mynsiem bad ha ka jingmut jingpyrkhat. Ym sngewdei shuh hi ban khot briew ïa ki namar ki briew ki dang don ka jingïatiplem bad ka pyrkhat ka pyrdaiñ kaba dang lah ban pynïapher hapdeng ka sang ka ma bad ka lynti kaba dei. Na ka por sha ka por, ngi ju ong ba ki bor jong ka aiñ ki dei ban pynsaja da kaba tyngeh ïa kiba leh ïa ki kam bymman kum ki kam pynïap briew khnang ba kan long ka jingsneng na ka bynta kiwei. Hynrei phewse kam ju long kumta. Kat nang don kiba shah pynsaja la ka dei ka jingshah set patok shirta jingim ne da ki bun snem, katta kiwei ki nang leh ïa kijuh ki kam bymman. Haei shuh ka jingsngewthuh? Kum ki briew, ngi ju shah kyntu ba ngin da pyrkhat bunsien shwa ban leh ïa kano-kano ka kam ne ban kren ïa kano-kano, bad ym ban shu bam-ja-khluit. Kita ki jingkyntu kynpham ki jah noh tang shi khyllipmat bad yn sa kyndit bynriew biang ynda la dep leh ïa ka kam bymman. Kam don jingmyntoi shuh ban babe kylla namar ka jingbabe kan ym lah ban pynim biang ïa uto uba ki la pynïap dusmon. Pyrkhat shwa ban leh ym ban pyrkhat hadien ba la dep leh ïa ka kam.
Ngi dei ruh ban kdew ba ym don satia kano-kano ka daw kaba lah ban pynksan ïa ka kam pynïap briew. Kiba pynksan ïa ka jingpynïap briew ki dei sa tang kito kiba la duh noh ïa ka jingïatiplem, bad namarkata, kim ïapher satia na kiba dkhat ïa ka jingim briew. Ka aiñ blei bad ka aiñ briew ki khang horkit-hordang ban shim ïa ka jingim jong ki para briew. Ka imlang-sahlang baroh kawei kam dei ban ailad ïa kiba kum kine ki kam bymman ban kha roi da kaba ïa mih shakhmat ban pynrem lane ban ïarap ïa ki pulit ban kem ïa kiba donkti lane ban ai ka kti kamon ka kti kadiang ïa ki bahaïing hasem jong kito kiba la duh noh ïa ka jingim. Ha kajuh ka por, naduh na ïing haduh ha skul, dei ban hikai sani bad janai ïa ka jingkordor ban ïa burom markylliang bad ym ban ïa dkhat ïa ka jingim jong kiwei. Ha ki shnong ki thaw, dei ban ïalap ïa kiba kum kine khnang ba naduh dang rit, ki briew kin ïoh ïa ka jinghikai kaba bha.
Ngi kyrmen ba kito kiba ngat ka apot kum u samla Mcbornbonnyson, u heprit na Umtyngar bad bun bah kiwei pat kin sa ïoh ïa ka hok shisien ka sngi lyngba ki bor jong ka aiñ. Ki pulit ki dei ban trei shitom ban pynthikna ba ka jingmudui pyrshah ïa kiba donkti kan long kaba skhem naduh ki sakhi haduh ki sabut khnang ba ka aiñ kan lah ban treikam da kaba tyngeh. Ka jingbishar kaba hok ka dei ban don lym kumta ngin sa duh jingkyrmen lut ha ka jingbun kita ki aiñ ki kanun kiba la buh la seng ban pynshitom ïa ki nongleh bymman. Ngi kitbok ruh ïa ki bahaïing hasem jong kine kiba la shah pynïap ba kin jop ha ka jingïakhun ban pynïoh ïa ka hok na ka bynta ki baieid bathoiñ ki jong ki.
