Guwahati, Lber 04
Ha ka rynsan ïakob ‘thei bhabriew kaba la long ha ITA Cultural Complex, Machkhowa ha ka janmiet jong ka Sngi Saitjaiñ, ka Dipti Basumatary na Assam, Monica Konjengbam na Manipur, bad ka Ridamaya Passah na Meghalaya ki la rah ïa ka nam jop ha ka kylla ba 20 jong ka ‘Sunsilk Serum Mega Miss North East, 2024’.
Ha kane ka rynsan ïakob, ym shym la don kyrdan ‘Runners-up’ bad baroh 3 ngut ki nongjop ki la ïoh pdiang ïa ka khusnam mar katjuh kum ki nongjop jong katei ka rynsan ïakob ‘thei bhabriew, ha ryngkat ka buskit bad jingmyntoi ba kumjuh.
Nalor ka jingjop ïa ka pansngiat ‘Sunsilk Serum Mega Miss North East’, 2 ngut na kitei ki nongjop ki la shah jied ban mihkhmat ïa ka India ha ki rynsan ïakob ‘thei bhabriew ba heh ka pyrthei. Ka Ridamaya Passah na Meghalaya ka la ïoh pdiang ïa ka khusnam ‘Mega Miss India – Top Model of Universe’ bad kan mihkhmat ïa ka India ha ka ‘Top Model of Universe’ ka ban sa long ha Turkey mynta u snem.
Ha kawei ka liang, ka Monica Konjengbam na Manipur ka la ïoh rah ïa ka nam jop ‘Mega Miss India- Continental World’ bad kan mihkhmat ïa ka India sha ka ‘Miss Continental World’ ka ban sa long ha Thailand mynta u snem.
