Shillong, Lber 05
Ka jingpynkhreh jong ka Balang Presbyterian Laitryngew, Sohra Presbytery ban pdiang ïa ka Khasi Jaiñtia Presbyterian (KJP) Synod Sepngi kaba Arphew Ar ka la ïaid shaid-shaid bad kane ka jingïaseng kan long naduh ka 7 tarik haduh 10 tarik u Lber ha Laitryngew.
Na ka liang u MLA ka Sohra, u Bah Gavin M Mylliem ha ryngkat ki nongïalam ka Balang na Laitryngew, ki nongïalam shnong kumjuh ki dkhot ka Sohra Presbytery ki la leit peit lang ha ka Sngi Ba-ar ïa ki jingdonkam na ka bynta kane ka jingïaseng naduh ki jaka ïeng kali, jaka pynlong jingïaseng haduh ki jaka leit bar nalor kiwei pat ki jingdonkam.
Ha kaba ïadei bad ki lynti bad surok, la shna ïa ki surok rong ha ki bynta bapher bapher jong ka shnong khnang ban pynsuk ïa kiba wan sha kane ka jingïaseng nalor ka umbam umdih.
U MLA u la ong ba ka jingpynkhreh ban shna ïa ki surok na ka bynta kane ka jingïaseng ka dei naduh u snem 2019 bad ka mang tyngka ka long kumba T. 10 klur ha u snem 2022 na ka bynta 5 KM ka surok haba kheiñ kyllum lang baroh.
U la ong ba na ka bynta ka um, la wanrah lyngba ka skhim sam um kaba la tip kum ka Laitryngew Mawkma Combined Water Supply Scheme kaba long T. 10 klur.
Na ka liang u Pastor Nongrud, Executive Secretary Sohra Presbytery u la ong ba ka Balang ha ka jingpynkhreh ïa ka jingïaseng Synod ka la pynbiang bha ïa ki jaka ïeng kali ban pynsuk ïa kiba wan sha kane ka jingïaseng.
