Khliehriat, Lber 05
Ka Joint Action Committee (JAC) jong ki Waheh Shnong hapoh ka Elaka Narpuh East Jaiñtia Hills District ki la rai ban pynlong da ka jingïakhih ban nym shah ïaid kali 24 kynta ha ka surok bah NH-6 ka ban long ha ka 7 tarik mynta u bnai kata naduh Tongseng haduh Ratacherra.
Ïa kane ka rai ka JAC kaba kynthup ïa ka Dorbar Shnong Ratacherra, Dona Umbluh, Dona Skul, Umkiang, Lumphyllut, Lumsoski, Pyrtakuna, Borsara, Kuliang, Shymplong bad Tongseng ka la shim ha ka jingïalang kaba kyrkieh kaba la long ha Lumshnong ha ka 5 tarik Lber.
U Waheh Shnong Umkiang uba dei ruh u Chairman ka JAC, u Bah Lasting Pala u la ong ha ka 15 tarik Kyllalyngkot ka JAC ka la dep ban ïakynduh ïa u Symbud Myntri Rangbah ka Jylla u Bah Prestone Tynsong uba khmih ïa ka tnat PWD ka Jylla bad la ïakren sani bha ha kaba ïadei bad ka jinglong jingman jong ka surok bah NH6 bad la ai 15 sngi ban maramot ïa ka surok kaba la jot rathai khamtam naduh Lumshnong haduh Malidor.
U la ong ba na ka liang u Bah Prestone u la pyntip ïa ka JAC ba la aiti ha ka Dhar Company ban pyntrei ïa ka surok hynrei kaba lyngngoh ka long ba haduh mynta ym don dak don shin ban pyntrei ïa kane ka surok.
Kumta dei halor kane ka nongrim, ka JAC ka la khot ïa ka jingïalang kyrkieh ïa ki Waheh Shnong bad da kawei ka sur la rai ban pynlong jingïakhih ha ka 7 tarik mynta u bnai ha katei ka surok, la ong u Chairman JAC.
Shuh shuh u la ong ka rai ban ïakhih ha katei ka surok ka dei namar bym don lad shuh da kumwei artad ba la dei ka por sdang skul jong ki khynnah bad tang na ka daw ka jingsahkut blok bun ki khynnah ki hap ban pep skul.
