Nongstoiñ, Lber:
Ha ka miet jong ka 3 tarik Lber, ka Dorbar Shnong Langja bad ka Hynñiewtrep Youth Council (HYC) Ri Mulliang Circle ki la mih paidbah ban pynpaw ïa ka jingpyrshah jur halor ka jingwan trei ki bar jylla ïa ka kam ‘post office’ ha ka shnong Langja, West Khasi Hills.
Ki nongïalam shnong bad nongïalam ka HYC ki la ïathuh ba ha katei ka miet ha ka jingleit khynra ki samla jong ka shnong Langja, ki la lap ïa ki bar jylla kiba la wan ban trei ïa ka kam ‘post office’ khlem da don ki kot ki sla kiba biang kum ka No Objection Certificate (NOC) na ka shnong.
Shuh shuh la ong ruh ba ha katei ka jingkhynra ïa ki kot ki sla, la lap pynban ba la don ki briew kiba kam Sordar Shnong ba la ai NOC tuh sha kitei ki bar jylla. Kumta dei halor kane ka nongrim ba la mih ka jingïania kaba jur na ki paid nongshong shnong namar ki la don ki briew kiba ïashah ïa ki bar jylla kiba la ai ruh ka ïing ban sah na ka bynta jong ki.
Ki la ong ruh ba utei u briew ba la ai NOC bad kam ïalade kum u sordar ka shnong u dei u bym don jingithuh na ka dorbar shnong. Kane ka la pynpaw shai ba utei u briew u la leh ïa ka kam tuh kam thiem kaba pynkulmar ïa ka shnong ka thaw bad ka shongsuk shongsaiñ.
Halor katei ka bynta, ka shnong bad ka seng ka la phah da ka jingujor pyrshah lyngba ka ejahar sha u Officer in-charge Langpih AD Camp bad ki la dawa ïa ki bor ka aiñ ban kem mardor ïa utei u briew uba la leh ïa katei ka kam tuh ka bym ïahap ha ka imlang sahlang.
