Shillong, Lber 05
Ka NorthEast United FC ka la thmu ban pynlong noh shabar na ka nongbah Guwahati ïa ki jingïalehkai jong ka Indian Super League (ISL) naduh ka aïom ban wan.
Kane ka kynhun kaba la ïashim bynta naduh kaba sdang jong katei ka lympung ha u 2014, ka la pynkhreh ban pynlong ïa ki jingïalehkai ha ka nongbah Shillong na ka bynta ka ISL. Dangshen ruh na ka liang ki bor ba dei khmih kane ka kynhun ki la wan jurip ïa ka Jawaharlal Nehru Stadium kaba ha Polo, hynrei kane ka madan ka dangdon hapdeng ka jingmaramot pynbha.
“Ngam shym ïohi ba la pynlong ïa ka jingïalehkai ha ka nongbah Shillong mynta ka aïom namar bym pat lah ban pyndep ïa ka jingmaramot,” la ong u CEO ka NorthEast u Mandar Tamhane.
“Na ka liang u Myntri Rangbah ka Meghalaya u Conrad Sangma u long ba kloi ban ai jingkyrshan bad u la pyrshang ban pyndep noh ïa ka jingpyntrei ha JN Stadium. Lada ym dei mynta ka aïom, hynrei nga kyrmen skhem ba ngin sa lah ban pynlong ha ka aïom ka ban wan.”
Khnang ban ïoh ïa ki nongkyrshan kylleng jong ka thaiñ shatei lammihngi, ka NorthEast United ka lah ban pynlong ïa ki jingïalehkai ISL tang ha kawei lane ar tylli ki jylla.
“Kane ka jingthmu ka long ban ïoh pynlong ïa ki katto katne ki jingïalehkai ha ki ar lane lai tylli ki jaka. Ngi kwah ban leit pynlong ha Manipur. Ngi ïohi ïa ka jingai jingkyrshan ïa ka kynhun ïalehkai ka ri. Ngin pyrshang ban ïoh pynlong kawei ka jingïalehkai ha katei ka jaka lada ka jinglong jingman ka la kham shngaiñ,” la ong u Tamhane.
Ka madan ïalehkai ha Kokrajhar, Assam kaba la ïoh ban pynlog ïa ka jingïalehkai na ka bynta ka Santosh Trophy ha u snem ba la lah, kan long kawei na ki jaka kaba ka NorthEast United ka kwah ban pynlong ïa ki jingïalehkai.
“Ka Guwahati ka long ka jingïalehkai (home matches), hynrei ka NEUFC ka lah ban pynlong ïa ar lane lai tylli ki jingïalehkai shabar,” la bynrap u Tamhane.
