Nongpoh, Lber 05
Kan long ka sngi sah jingkynmaw ïa ka thaiñ Ri Bhoi District hi baroh kawei ha kaba ka shnong Umbuda kan long kaba nyngkong eh ka ban ïoh ïa ka madan ïalehkai phutbol kaba paka kaban siang da u phlang plastik ne Artificial Football Turf ha ka jinglut kumba ` 10.93 klur tam.
Kane ka la wan urlong hadien 31 snem naduh ba ka Ri Bhoi ka la ïoh la ka jong ki district kaba pura kata haduh u 4 tarik u Jylliew jong u snem 1992. Ka dei ruh ka jing-angnud kaba la slem bha da ki nongïalam jong ki kynhun bapher bapher kiba kynthup naduh ka synjuk ïalehkai jong ka Ri Bhoi District Sports Association (RBDSA) bad khamtam eh ka jingthrang dik dik jong ki khun samla jong ka thaiñ Ribhoi ban ïoh noh ïa ka madan ïalehkai phutbol kaba paka bad ka ban ïaryngkat kyrdan bad kiwei ki district jong ka Jylla.
Na ka bynta kane ka projek la plie shwa da u mawnongrim da u Myntri Rangbah ka Jylla u Conrad K. Sangma, ha ka jingïadonlang u Myntri ba dei khmih ïa ka tnat ïalehkai u Bah Shakliar Warjri, u MLA ka Nongpoh u Bah Mayralborn Syiem uba dei ruh u Chairman ka Meghalaya State Health Board Advisory, Bah Sosthenes Sohtun, MLA ka Jirang uba dei ruh u Chief Whip jong ka Sorkar Jylla, Bah Bibatdor M. Syiem, Chief Engineer ka State Sports Council Meghalaya (SSCM), Bah M.B Tongper, ADC Ribhoi, Bah Khroobok Passah, Asst. Director ka tnat ïalehkai, ki nongïalam jong ka RBDSA, ki seng Bhalang bapher bapher bad kiwei kiwei.
Ïa katei ka madan ïalehkai phutbol kaba la pynmang ban tei la khmih lynti ban sa sdang noh shen bad ban pyndep ha u snem ban wan.
Haba ai jingkren ha kane ka sngi, u Myntri Rangbah ka Jylla, u Conrad Sangma u la ong ba kane ka dei ka sngi kaba dap da ki jingkyrkhu bad ka ban sah jingkynmaw na ka bynta kane ka thaiñ, ha kaba sa tang katto katne bnai ka madan ïalehkai kaba bit bad kaba biang kan sa ïeng ha kane ka jaka.
U la ai ka jingkhublei ïa u Myntri ka tnat ïalehkai bad ïa ki ophisar na ka tnad Sports and Youth Affairs kiba la treishitom ban pynurlong ïa kane ka kam kaba khraw. U la pynpaw ruh ba na ka liang ka Sorkar lem bad ka tnad ïalehkai ka la pyni shisha ïa ki kam kiba khraw ha ka ban kyntiew ïa ki kam ïalehkai hapoh ka Jylla lada ïa nujor bad ki snem kiba mynshwa naduh ba ngi ioh ïa ka jylla Meghalaya.
Lah ban ong ba kane ka jingai sngewbha ka Sorkar da katei ka madan phlang plastik ka long hadien ba ka kynhun ki rang bad ki ‘thei ïalehkai ka Ri Bhoi ki la khur ïa ka takma ksiar ha ka jingïalehkai phutbol jong ka 5th Meghalaya Games kaba la kut dangshen ha Tura, West Garo Hills.
