Shillong, Lber 05
Ki pulit jong ka Jhalupara Outpost ha ryngkat bad ka kynhun Special Rescue Team (SRT) bad ka State Disaster Response Force (SDRF) ka jylla ha ka nohphai sngi jong ka 5 tarik u Lber, ki la ïoh ban sei ïa ka metïap jong u rangbah ba la tip kyrteng kum u Bah Kynsailin Kharphanbuh ba ju khot ieid u Bah Ïit, 60 snem ka kyrta ba shong ba sah ha Lummawbah Block-3 Upper Shillong napoh ka khrum jingkieng jong ka Wah Umshyrpi.
Kum ban shu kdew hangne, u Bah Kynsailin Kharphanbuh u la jah na la ïing naduh ka 1 tarik u Lber 2024 ha ka por mynstep. Kumta na ka liang ka shnong hadien kane ka jingjia ki la pynlong da ka jingwad shnong ha kylleng sawdong ki jaka ba marjan hynrei kim shym la lap satia ïa u Bah Kynsailin bad na ka liang ki bahaïing-bahasem ki la ujor noh da ka ejahar ha Jhalupara Outpost halor ka jingjah jong utei u rangbah.
Ki bahaïing bahasem bad ki nongshong shnong naduh ka sngi ba u Bah Kynsailin u la jah na la ïing ki khlem shongthait satia ban wad ïa u bad ka dei ha ka nohphai sngi jong ka 5 tarik u Lber 2024 la lap ïa ka metïap jong utei u rangbah na khrum ka jingkieng Umshyrpi da ki paidbah hadien ba ka shnong ka la pynlong ka jingwad ïa utei u rangbah.
Na ka liang ki pulit ka Jhalupara Outpost ha ryngkat bad ka kynhun Special Rescue Team (SRT) bad ka State Disaster Response Force (SDRF) ka jylla mar sien ïoh jingtip halor katei ka jingjia ki la leit mar-mar sha katei ka jaka ban sei noh ïa ka metïap jong utei u rangbah.
