Guwahati, Lber:
Ha ka jingpynlong ïa ka jingpyntreikam kaba ïadei bad ka jingleit thwet bad khynra kaba la long ha ka Lah Sngi U Blei, ka kynhun jong ki shipai ka tnat Indian Army bad ki pulit jong ka Assam ki la ïoh ban kurup ïa shibun ki bom pynbthei kiba la tep hapoh kawei ka jaka hajan khappud Assam-Mizoram.
Kum ka jingpyntreikam hadien ba la ïoh jingtip halor kane, ka kynhun ba la ïatreilang hapdeng ki shipai bad ki pulit jong ka Dholai, ki la leit pynlong ïa ka jing-leit khynra ha kawei ka jaka kaba don hajan ka Farm jong uwei u briew ba la tip kyrteng kum u Salim Uddin ha Rajghat, kaba don ha Cachar distrik.
Kane ka jingpyntreikam ka la long kaba jop, ha kaba la lap lajan 2,900 tylli ki bom pynbthei bad 13 kilo ki phngit bom ba la tep hapoh ka khyndew. Ha kaba ïadei bad kane ka jingjia, u Salim Uddin, uba long u snar nongïalam ha kane ka jingjia, u la lait ban phet bad lait na ka jingshahkem ha ka por ba don ka jingleit khynra. Ki pulit ki la pynjur ïa ka jingpyntreikam ha ka ban leit thwet jur khnang ban ïohkem ïa u.
Kumba la ïathuh, la ong ba u Salim u la donkti ha kiba bun ki kam beaiñ, kynthup ha kaba ïadei bad ki kam khaïi drok, ha kaba u la shah set patok teng ha ki por ba la leit. Kumba la ïathuh ka tyllong khubor, la ong ba une uba la shah kynnoh u la sdang biang ïa ki kam sniew jong u hadien ba u la shah pyllait jamin.
