Shillong, Lber:
U Myntri Rangbah ka Jylla, u Conrad K. Sangma, ha ka Lah Sngi U Blei u la plie ïa ka ‘Academic Block’ bad ka jaka sah ki kynthei bad shynrang jong ka Captain Williamson Sangma Government College ha ka jingïalang kaba la long ha phyllaw jong ka kolej ha ryngkat ka jingdonlang u Myntri ka tnad pule-puthi, u Rakkam A. Sangma, MLA ka Baghmara, Kartush R. Marak, MLA ka Amlarem & Chief Advisor sha ka Sorkar, Bah Lakhmen Rymbui bad u Chief Secretary, Bah D.P. Wahlang.
Haba ai jingkren ha ka jingïalang, u Myntri Rangbah u la ai burom ïa u P.A. Sangma (Bam Kwai ha Dwar U Blei), ha ka lyngkhuh sngi ïap kaba 8 jong u bad ong, “Ka dei ha ryngkat ka jingïoh jngai bad jingngeit kaba u P.A. Sangma u don – ba ban ïalam shakhmat ïa ka Jylla, donkam ban buh hakhmat ïa ka pule-puthi, bad u la buh ïa u maw nongrim na bynta kane ka kolej ha u 2008 bad ka ïahap bha bad kane ka sngi, ka projek kaba u la dep pyrkhat ha u 2008, ka la ïaid ha ka lynti kaba dei bad ngi la lah ban plie ïa kane ka shlem ai jinghikai ha ki jingpule ba shajrong na bynta ki samla bad ki nongshong shnong ka South Garo Hills.”
U la pynpaw ruh ka jingsngewnguh ïa u Myntri barim ka tnad pule-puthi lem bad ka kynhun jong u kiba la sdang ïa ka kam ba ïadei bad ka jingwanrah jingkylla ha ka tnad pule-puthi.
U Sangma u la ong ba ka thong bad ka jingïohi jngai ba la buh da ka tnad pule-puthi 5 snem mynshuwa, ka la seisoh ha ka ban ïaid shakhmat wat ha kane ka por ba mynta.
“Nga tikna ba ka tnad pule-puthi kan sa sakhi ïa ki jingkylla kiba khraw ha ki sngi ban wan hapoh ka jingïalam jong u Myntri ba mynta,” u la bynrap.
U la ong ruh ba ki samla ki long ki jingdon-jingem ba kordor hynrei ki donkam ka rynsan kaba biang, ki lad ki lynti bad ka jingkdew lynti ban pyndonkam hok ïa ka bor bad ka sap ka phong jong ki.
U la ong ba ka pule-puthi ka long ka tnad kaba hakhmat eh jong ka Sorkar bad kumta ka Sorkar ha u 2024 ka la kyntiew ïa ka mang tyngka na bynta ka pule-puthi na ka ` 27 klur sha ka ` 350 klur – nalor ka jingbuh bynta kaba ` 3000 klur na bynta ka jingpynlut ïa ki samla.
U Myntri Rangbah u la ong ruh ba u la wan jngoh bad jurip ïa ka Baghmara College ha u 2019 bad shem ba ka ïingmala ka long ka bym shngaiñ na bynta ki samla pule nalor ba ka la rim.
“Nga da sngewkmen shi kat dei eh ba hapoh 5 snem, ngi la lah ban pynbiang ïa kane ka jingtei bathymmai na bynta ki samla bad paidbah ka Baghmara,” u la ong da kaba bynrap ba ka Kynhun Myntri shen kan sa mynjur ïa ka jingtyrwa na bynta ka tnad pule Science & Commerce ha ki kolej ha Sohra, Williamnagar bad Baghmara.
U la ong ruh ba ki prokram halor ka roi ka par bad ki mat treikam na bynta ka South Garo Hills – kaba hakhmat eh ka long ban wanrah ïa ka projek na bynta ka Baghmara Civil Hospital.
“Ka DoNER ka la dep mang ` 15 klur ban thaw shuh sa 150 tylli ki jingthiah ha Baghmara Civil Hospital bad ka Sorkar Jylla ka la mang shuh sa ` 5 klur na bynta ban tei ïa ka jaka sah ki nongtrei, doktor bad ki nos,” u la pynbna.
Na ka liang u Myntri Rangbah u la kyntu ïa ki nonghikai bad khynnah pule ban shim ka jingkitkhlieh bad ban pynlong ïa ka kolej sha ka jaka pdeng jong ka jingnang jingstad.
“Ai ba kane ka kolej kan long ka jaka ha kaba ki proh jabieng ki ïakynduh, ïamir jingmut bad sei ïa ki buit ban wanrah ïa ka jingsarong ha lade, ka distrik bad ka Jylla,” u la ong.
