Shillong, Lber:
Namar ka jingïoh pdiang ïa ki jingud-jingnam bad ka jingujor na ki nongïaid nongïeng bad ki nongshong shnong ka thaiñ Upper Mawprem halor ka jingker tin jong ki trai ka karkhana Magik Cook kaba don ha ka surokbah Garikhana shaduh ka jaka ïaid kjat jong ki paidbah, kumta ka la pynlong ïa ka Khasi Student’s Union (KSU) Mawprem Circle bad ka Dorbar Shnong Nongsohphoh, Upper Mawprem ba kin leit sha katei ka jaka ban khmih bad ban dawa na u trai jong katei ka karkhana ban weng noh shisyndon ïa kitei ki jingker tin baroh.
Kum ban shu pynkynmaw hangne, katei ka karkhana Magik Cook ka la pluh bad shah bam duh ha ki thylliej ding kiba klang ha ka shiteng synñia jong ka 2 tarik u Nohprah, 2023.
Na ka liang u Acting Rangbah Shnong ka Nongsohphoh Upper Mawprem, u Bah H Ryntathiang, u la ïathuh ba kane ka jingleh jong u trai ka Magik Cook ban ker tin kumtei ka la pynsngewsih ïa ka shnong namar ba ha shwa ba un ker tin kumtei ruh, u khlem ïoh jingbit satia na ka Dorbar Shnong.
“Ha ka por ba ka ing kane ka karkhana, na ka por sha ka por ngi don ryngkat lang bad ngi ïatreilang ryngkat bad kane ka karkhana hynrei ha kane ka por pat ha shwa ba un ker ïa kane ka tin, u lah dei ban kynjoh ktien ïa ka shnong tangba ïa kata ruh u khlem leh satia”, la ong u Bah Ryntathiang.
U Bah Ryntathiang u la ïathuh ruh ba ha katei ka jingwan ïakren jong ka Dorbar Shnong bad utei u trai ka karkhana, utei u trai ka karkhana u la pan por lai bnai na ka shnong hynrei na ka liang ka shnong ka la kren da kaba shai ba kam lah ban aipor haduh lai bnai.
U Bah Ryntathiang u la ïathuh ruh ba haba ka shnong ka la kylli na utei u trai ka karkhana, la hato u la ïoh jingbit ne em na ka tnad PWD ne na ki tnad bapher bapher ba dei khmih hashwa ba un ker tin kumtei shaduh sha surok? Utei u trai karkhana u la ong ba um pat ïoh satia kano-kano ka jingbit bad un sa leit ban aplai ha katei ka sngi.
“Kata ka jingleh sting ïa u ha kaba wat ïa ka shnong ruh um kynjoh ktien bad ïa ki tnad ruh um kynjoh ktien khamtam eh ba ka dei ka lynti ïaid kjat kaba don marjan bad ka surokbah ruh um kitkhia”, la ong u Bah Ryntathiang.
Na ka liang ka Dorbar Shnong ka la ong ba katei ka jingker tin jong u trai ka Magik Cook shaduh ka jaka ïaid kjat jong ki paidbah ka la buh jingeh shikatdei eh ïa ki nongleit-nongwan. Kumta na ka liang ka Dorbar Shnong ka la aipor shitaïew thik ïa u trai katei ka karkhana ba un weng ïa kitei ki tin kiba u la ker bad ban wanrah sha u pud u sam lajong.
“Ngi la ïa poi ha kata ka jingïakut ba kin sa pynpra noh bad kane kaba ki ker ïa ka lynti ïaid kjat ruh kin pyllait noh”, la ong u Bah Ryntathiang.
Na ka liang u Bah Aris Thabah, President ka KSU Mawprem Circle, u la ong ba katei ka jingker ruh ka long kaba isaitmet namar ba u la ker shaduh ka surokbah ba dei khmih da ka PWD.
U Bah Thabah u la ong ruh ba utei u trai ka karkhana u la ai ïa ka kot sha ka Dorbar Shnong ha katei kajuh ka sngi ba u la dep ban ker tin bad ha ka jingwan jurip jong ka bor shnong ïa katei ka jaka hynrei na ka liang ka Dorbar Shnong ka khlem pdiang satia ïa katei ka kot ba la ai da utei u trai ka karkhana.
Shuh shuh u Bah Thabah u la kyrpad lem ruh ïa ka tnad PWD ba kan peit lem ha kaba ïadei bad kane namar ka jingleh jong kane ka karkhana ka la ktah ïa ka leit ka wan jong u paidbah.
“Lada ka aiñ ka treikam ïa baroh khoit, te pyntreikam lang ïa kine ki briew, ym dei ban ong tang kiba heh ba haiñ ki lah ban shu leh katba ki mon”, la ong u Bah Thabah.
