Kabul, Lber:
Katkum ka kaiphod ba la ioh lum jingkheiñ thymmai ha ka janmiet Lah Sngi U Blei, la ong ba ka jingdon kiba khlad na ka jingjur palat ka jinghap ïor ha Afghanistan ka la kiew sha ka 39 ngut bad 30 ngut pat kiba la shah ktah bad mynsaw na kylleng ki thaiñ jong ka Afghanistan.
La ong ba katei ka jingheh thah bad jur ka hap ior ha Afghanistan ka la pynthud ia ki kam ki jam bad ka la kerkut bad khang noh ruh ia ki surok kiba pher kiba dei ban iaid lyngba na kawei ka distrik sha kawei pat.
U nongrah ktien jong ka tnat Ministry of Disaster Management u la ong ba da ki hajar tam ki jingri ruh ki la shu duh ei bad iap naphang namar katei ka jingkhriat bad ka jingsop thah kaba jur tam eh ha ka tlang jong une u snem.
La ong ba katkum ka jingioh jingkheiñ jong ka sorkar Afghanistan, la shem ba ki don palat 637 tylli ki iingbriew bad palat 14,000 tylli ki jingri kiba la julor bad duh ei namar ka jing jur slap bad jinghap thah kaba jur ha kine ki khyndiat bnai mynta.
Haba iadei bad kane, la ong ruh ba ia ka surok bah ‘Salang Highway’ ki dang shu plie bad pyllait ia ki kali paidbah ba kin iaid naduh ka Sngi Nyngkonb ad ka la long ruh hadien kumba 4 sngi ba katei ka ri ka la ioh mad ia ka jinghap ioh bad jingsop thah kaba jur.
Kumta la ong ba kane ka pyni shai ba haba ki bor pyniaid, ki tnat ba dei khmih bad ka sorkar, lada kim long ba la pynkhreh lypa ia kum kine ki jingjia bad ki bor jong ka mariang, kan wanrah ia ka jingduh nong kaba khraw bad kan ktah jur ym tang ia ki tiar ki tar ne ki jingtei hynrei wat ia ki jingri- jingdap baroh namar ba kim lah shuh ban ai ia ka jingiada ha ka por kaba kyrkieh ynda ka um ka la poi ha ryndang.
Katkum katei ka kaiphod, la shem ba kiba bun hi ki jingjulor bad jingduh ki long na ki thaiñ Balkh bad Faryab kiba la mad bha ia utei u lap’bah bad ka jinghap ior ruh kaba jur bha ha kane ka tlang ha une u snem mynta.
