Washington, Lber:
Ka White House ha ka Lah Sngi U Blei ka la ong ba ka long kaba donkam haduh katta-katta ban pynsangeh noh shipor ia ka thma hapdeng ka Israel bad lehnoh Hamas hapoh Gaza bad kumta ruh ka US ka la kyntu katlah-katiai ia ka Hamas ba kan pdiang ia ka jingtyrwa sangeh iasiat ba shipor bad pyllait noh ruh ia kito kiba la shah rahbor bad kiba dang don ha kti katei kynhun lehnoh katba katei ka jingsangeh thma ka dang iaid shakhmat.
U Lamphang jong ka National Security ka White House, u John Kirby ha katei ka sngi u la ong ba ka United States kan ialeh shitom ban pynsangeh noh ia ka thma jong ka Israel pyrshah ia ka Gaza bad ha kajuh ruh ka por u la ong ba ka US ka ngeit skhem ba katei ka thma kan sangeh noh shwa ban poi katei ka jingleh niam ki paid riewngeit Muslim kaba ju tip kum ka ‘Ramadan’. Kumba la pynpaw da ka Qatar ba katei ka ri ruh ka kwah ba ka tham Israel kan sangeh noh shwa wat la ka long tang shipor ruh katba dang iaid katei ka jingleh niam kaba shisien lano khnang ba kan lait ruh ban wanrah ia kino-kino ki jingjia sngewsih ne kiba ktah ia ka jinglong-jingman jong katei ka jinglehniam ha katei ka ri.
