Sderot, Lber:
Ha kane ka kynti, la ong ba ki bor pyniaid ka Israel ki la sdang ban pynbteng biang ia ka jingpule na ka bynta ki khynnah pule jong katei ka ri ha ka nongbah Sderot kaba la shah thombor ha ki lehnoh Hamas ha ka 7 tarik u Risaw mynshem snem.
Kumta la ong ba ki khynnah rit bad ki khynnah pule baroh ki la leit ban bteng bad sdang biang ia ka jingpule sha la ki skul ha katei ka Sngi U Blei bad ha katei ka shnong Sderot kaba long kawei na ki shnong kaba la shah pynjot ha ki lehnoh Hamas naduh ba khie ka thma namar katei ka shnong ka don ha ki bynta khappud jong ka Israel bad Gaza.
Wat la katta, la ong ba ki paidbah na katei ka shnong ki dang lah ban ïohsngew ia ka jingriew ki ktang suloi kumba katto katne kilometre ka jingjngai na katei ka shnong sha kiwei pat ha Gaza kiba ka jingiakhun hapdeng ki shipai ka Israel bad ki lehnoh Hamas ka dang iai bteng.
Hynrei la ong ba ka Israel ka la pyniaid ia ki kam ki jam baroh ha ryngkat ka jing pahara kaba skhem bad ba jur bha.
