Nongstoiñ, Lber 05
Ka Kur Kharbani napoh Pathew, Parïong ha Eastern West Khasi Hills District, ha ka Sngi Ba-ar ka la leit ban ujor sa kawei ka ejahar ha thanat Nongstoiñ ban dawa na ka tnat pulit ba ki dei ban thwet bad kem sa ïa kiwei pat ki briew kiba donkti pynïap ïa u samla Mackbornbonnyson Kharbani kaba la jia ha ka 3 tarik mynta u bnai ha Taxi Stand Kynroh, ha Upper New-Nongstoiñ.
Haba kren sha ki lad pathai khubor, u Bah Shaitkitbok Kharbani uba mihkhmat na ka kur Kharbani u la ong, ka jingwan buh biang ïa ka ejahar ka dei hadien ba ka kur ka la ïoh ïa ki katto katne ki sakhi kiba ki don kiba ïohi ïa kane ka jingjia ba um dei tang uwei uba leh ïa kane ka kam bad ruh ba ka kur ka la ïoh ïa ki ‘call record’ kiba pynshisha ba ki don sa katto-katne ngut ki briew kiba la leh ïa kane ka kam bad ha ka jingïakren bad ki pulit, ki la suba ba ki dang don sa kiwei pat.
U Bah Shaitkitbok u kyntu ïa ki paid nongshong shnong ka Nongstoiñ kiba lah ban ïohi ïa kane ka jingjia ba kin mih shakhmat ban ïasnohktilang bad ka kur ban rat dyngkhong ïa kum kine ki kam sniew.
“Hooid, u kur u jait jong ngi, u la duh ei ïa la ka jingim hynrei ngim kwah ba kiwei pat ki nongshong shnong jong ka Nongstoiñ kin mad ïa kiba kum kine ki jingjia,” la ong u Bah Shaitkitbok.
Shuh shuh u la ong ruh ba ka jingshah pynïap jong u Mackbornbonnyson lehse kam dei kaba ki da thmu namar katkum ka jingïohsngew lyngba ka ‘phone call’ ba u pan jingïarap na ïing da kaba ong ban wan ïarap ïa u, namar ki briew saw ngut ki la wan ban kdong lynti ïa u. Haba ki kylli la u ithuh ne em ïa ki, hynrei u la ong ba em ym ithuh satia ki dei mano bad katba ki bahaïing ki dang don ha kata ka jingïakren ki la ïohsngew ba ki kylli ba me dei ne em u khun jong u Bah Jost bad u la ong em um dei, hynrei kaba lyngngoh ka long ba ynda ki bahaïing ki la poi ha katei ka jaka, ki la lap pynban ba utei u samla u la thiah lyngktar ha madan.
U Bah Shaitkitbok u la ong, kumba la ïoh ïa ka ‘post mortem’ bad kumba la ïohi ïa kata ka rukom shah pynïap dusmon jong u Mackbornbonnyson, kan dei hi kaba la thmu ban pynïap dusmon.
Namarkata, u la ong sa shisien ka kur ka kyrpad ïa ki nongshong shnong ka Nongstoiñ ban mih shakhmat ban rat dyngkhong ïa kine ki kam sniew. Ha kajuh ka por na ka liang ka kur Kharbani ka kyntu ïa ki bor jong ka aiñ ba kin kem lut ïa kine ki briew bad la dawa ruh ba dei ban pynngat bad pynshitom ha ki kyndon aiñ ba tyngeh.
Ha katei ka sngi ba la leit buh ïa ka ejahar, nalor ki bahaïing u samla Mackbornbonnyson, ki kur Kharbani la synran lang ruh da kiba bun ki dkhot bad ki nongkitkam jong kynhun seng bapher bapher ha West Khasi Hills ba kynthup na ka HITO, Ri Khasi Sepngi, Khasi Student Union bad kiwei kiwei kiba ka pynpaw ïa ka jingpynrem bad sngewkhia jur ïa katei ka jingjia, ha kaba ki la kyntu ïa ka tnat pulit ba ka dei ban wad ïa baroh kiba donkti ban pynïap.
