Shillong, Lber 05
Ka Deputy Inspector General of Police (TAP) Kong Claudia Lyngwa ha ka Sngi Ba-ar ka la pyntip ba kumba long mynta, ki dkhot jong ka seng kieng atiar Hynñiewtrep National Liberation Council (HNLC) ki don sa tang kumba 20 haduh 30 ngut eiei.
“Katkum ki jingtip kiba ngi la ïoh lum, ka jingkhlaiñ jong ka HNLC ha ka jingdon ki dkhot ka long sa tang kumba 20 haduh 30 ngut eiei. Hynrei ngim lah pat ban batai ki don tiar siat kiba kumno shathie hynrei hangne ki don ïa ki tiar barit baria,” la ong ka Kong Claudia Lyngwa haba kren sha ki lad pathai khubor.
Ha kawei pat ka liang, ka Kong Lyngwa ka la ïathuh ba u Storgy Lyngdoh u la wan rung sha Meghalaya na Bangladesh bad u la shah kem noh ha ki pulit jong ka jylla.
Haba kylli, ka DIG ka la ong, “Une u briew u la leit sha Bangladesh bad kane ka long kaba sngewthuh shai ba lada u kwah ban pyndem wait, u la dei ban don beit hapoh Shillong katba ka sorkar ka dang ïakren, kumta na ka jingsngew ka jong ngi ka jingleit phai biang ka jong u sha Bangladesh bad ban wanphai na Bangladesh, kaba mut kumno. Nga ieh ha phi ban sngewthuh.”
Ka Kong Lyngwa ka la ong ba kam shym la don satia ka shithi dawa pisa ba la sam da une u dkhot ba la shah kem, hynrei na ka ‘phone’ ka jong u, ki pulit ki la lap ba ki la don bun ngut kiba la shah dawa pisa.
Ka la ong ruh ba ka jingkhang ka dang plie ïa ka HNLC ban ïakren ïasuk namar ka jingkem ïa u Storgy Lyngdoh ka dei halor ki kam dawa pisa.
Haba pynpaw ba ka jingtohkit kan dang ïaid shakhmat bad kan ym sangeh, ka Kong Lyngwa ka la ong, “Ka jingïakren ïasuk kan ïaid shakhmat bad lada don kino-kino kiba leh ïa ki kam be-aiñ, ngin hap ban leh ïa kaba donkam pyrshah ïa ki”.
Shuh shuh ka Kong Lyngwa ka la ong, “Ka kam jong ngi ka long ba haba ngi ïoh ki jingtip kiba wan sha ngi, ngi shimkhia mardor badkane kan wanrah ka jingshaniah ha ki paidbah. Naduh ka por ba la sdang ïa ka HNLC hapoh Meghalaya, ki pulit ki la trei shitom khlem shongthait bad kiba bun ki pulit ki la aiti bad len lade ruh ïa la ka jingim ha ka jingïakhun. Phin lah ban ïohi ka jingshong suk hapoh ka jylla bad ka jingkiew jong ki nongwan jngohkai pyrthei kiba la wan, kaba la pynkylla ruh ïa ka dur jong ka jylla, bad kane ka dei namar ba ki pulit ki la trei shitom bad kane hi kan wanrah ka jingshaniah ha ki nongshong shnong.”
Ha kajuh ka por ka DIG ka la maham ruh ïa kito ki briew kiba noh synñiang ne ïarap ïa ka HNLC, kin shah pynshitom bad shah pynngat ha ki kyndon aiñ.
