Shillong, Lber 05
Ka Federation of Khasi Jaiñtia & Garo People (FKJGP) Balat Border Area ka la dawa na ki bor jong ka aiñ naduh ki pulit bad ki BSF ba kin tehlakam noh ïa ka jingjyllei ki kali kit be-aiñ ïa ki mar bam na India sha Bangladesh lyngba ka surok Tlongpleng sha Balat, Laitumsaw kaba hap ha East Khasi Hills bad South West Khasi Hills.
Kane ka jingdawa ka FKJGP ka dei namar ka jingbun palat ki trok kit piat, shini bad khaïi masi kaba la pynjot ïa ka surok kaba dang shu dep siang na Tlongpleng shaduh Balat bad Laitumsaw.
Katkum ka kyrwoh ba la phah da u President ka FKJGP Balat Border Area, Bah Sengborlang Syiemlieh, u la ong ka jingjur palat ka jingkhaïi be-aiñ ïa ki mar bam kum u piat, shini, masi sha Bangladesh ka la pynsniew ïa ka surok namar la ïaid da ki trok barit bad baheh. Kane kan ktah ïa ki paidbah ka thaiñ namar kan buh jingeh ïa kiba pang ba shitom kumjuh ha ka kit ka bah.
U la ong ba kane ka jingkhaïi be-aiñ kan ktah ïa ka sorkar namar kan nym ïoh khajna na kine ki mar bam kiba shalan tuh sha Bangladesh.
Kumta u la dawa na ka sorkar ba ka dei ban shimkhia mardor ïa kane ka jingkhaïi sha Bangladesh lym kumta ka seng kan sa shim hi ïa ka jingkitkhlieh na ka bynta ka jingmyntoi ki paidbah ka thaiñ.
Shuh shuh u la ong ba ka jingmih ka seng shakhmat ka dei ka jingud ki paidbah namar ka jingsniew palat ka surok naduh ba wan ïaid ki trok barit bad baheh sha Balat, Dangar bad Laitumsaw.
Kumjuh ruh ki paidbah kiba la ujor sha ka seng ki la pyntip ba ka jingjyllei ki trok kit piat mynta sha Bangladesh ki la kit da ki trok khatar shaka kaba la pynkhapngiah ïa ki kali rit lada poi ha ki surok rit bad riat.
