Shillong, Lber 05
Ka kynhun ki ‘thei ïalehkai Under-16 ka India ka la mad ïa ka jingshah rem ha ka Bangladesh da 1-3 kol ha ka lympung ïalehkai SAFF U19 Women’s Championship kaba la long ha ka Sngi Ba-ar ha ANFA Sports Complex kaba ha Lalitpur, Nepal.
Lyngba kane ka jingjop, ka Bangladesh ka la ïoh ban bat ïa ka kyrdan ba hakhlieh napdeng ki saw tylli ki kynhun ryngkat 6 point na ki saw sien ïakhun. Nangta, ka la buh jaka ruh ïalade sha ka final, katba ka India ka dang ïai sah 3 point na ki saw sien ïakhun.
Kumta ka India kan hap ban ïakhun tyngeh pyrshah ïa ka Nepal ka ban long ha ka 7 tarik na ka bynta ban pynthikna ban ïoh rung sha ka final.
Haba phai sha kane ka jingïakhun ka Bangladesh ka la ïoh ban pynkhih jar nyngkong eh tang mar ïasdang ka jingïalehkai lyngba ka Alpi Akter ha ka minit kaba 9. Kane ka shi kol ka la ïai neh haduh kaba kut jong ka kylla step.
Ka ‘thei ïalehkai ‘dien ka Jylla ka Bonifilia Shullai ka la ïoh ban mih madan naduh kaba sdang jong ka jingïalehkai.
Hadien ba la bteng ïa ka kylla miet ka India ka la lah ban pynïakhaid kylla lyngba ka Anushka Kumari ha ka minit kaba 55. Hynrei ka Bangladesh ka la ïoh ban thep biang sa ar kol lyngba ka Sauravi Akanda Prity (79′) bad ka Arpita Biswas (89′) na ka bynta ban khur syndon ïa ka jingjop.
