Shillong, Lber 05
Ka Manipur kaba la long ka kynhun kaba la bat teng ia ka nam lahduh, ka la pynjemkhnap ïa ka Assam haduh 7-1 kol ha ka quarter final jong ka lympung ïalehkai Santosh Trophy kaba la long ha ka Sngi Ba-ar ha Golden Jubilee Stadium kaba ha Itanagar.
U Wangkheimayum Sadananda Singh u la ïoh ïa ka hat-trick na ka bynta ban pynlong ïa kane ka kynhun ban jam sha ka semi final.
Tang hapoh 20 minit ka Manipur ka la ïoh ban thep haduh 4-0 kol bad ïa kiwei pat la thep ha ka kylla miet. U Phijam Sanathoi Meetei u la ïoh ban pynkhih jar ha ka minit kaba 4. U Wangkheimayum u la thep ar kol ha ka minit kaba 11 & 16, katba ïa kawei pat la thep lyngba ka penalty da u Ngangbam Pacha Singh (19′).
Hadien katto katne por ba la bteng ïa ka kylla miet, ka Assam ka la lah ban pynphai kylla shi kol lyngba u Joydeep Gogoi (64′). Hadien saw minit ka Manipur ka la ïoh ban thep kol lyngba u Wangkheimayum uba la khur syndon ïa ka hat-trick. Ha shwa ban wai ka Manipur ka la thep biang sa ar kol lyngba u Maibam Deny Singh (82′) bad u Imarson Meitei (88′) na ka bynta ban khur syndon ïa ka jingjop.
