Shillong, Lber 05
Napdeng ki 6 ngut kiba la thmu ban pynkhie im biang ïa ka seng kieng atiar na rilum Garo ka Garo National Liberation Army (GNLA), haduh 3 ngut ki la shah kem bad 3 ngut kiwei pat ki dang phet rieh.
Napdeng kitei 3 ngut kiba la shah kem, la pyntip ba uwei u dei u dkhot barim jong ka seng kieng atiar ka United Achik Liberation Army (UALA) ba la tip kyrteng kum u Simsang K Marak, 40 snem na Resubelpara.
Haba kren sha ki lad pathai khubor, u Superintendent of Police ka North Garo Hills Bruno A Sangma u la ong, u Simsang u dei uba la ïoh song jingïarap na ka Sorkar bad u dei uba hakhmat eh ban donkti ha kane ka kam. U dei ruh uba la shah thwet bha ha ki pulit ka Assam.
U la ong, “Ka ïingbishar na Assam ka la ai da ka MPWA pyrshah ïa u bad ngin sa aiti ïa u sha ki pulit ka Assam hadien ba ngi la dep ban pynlong ïa ka jingtohkit ha North Garo Hills.”
Katba 2 ngut kiwei pat kiba la shah kem ki dei ba la tip kyrteng kum u T Sangma, 40 snem bad u Suresh Sangma, 32 snem kiba dei na ka shnong Adogre.
U SP u la pyntip ba ha ka 7 tarik Rymphang ka la don ka jingthep jingthoh hapoh ki rynsan social media kaba ong ba ka la don ka jingpyrshang ban pynkhie im biang ïa ka GNLA. Katba ha ka 24 tarik Rymphang pat ki pulit ka thanat Kharkutta ki la ïoh pdiang ka ejahar halor kane bad ki la leit ban kem noh ïa kine ki briew.
“Na ka met jong kine kiba la shah kem, la ïoh ban kurup ïa ki mobile phone kiba pyndonkam ha kine ki kam bymman bad ong ruh ba ki la dawa pisa ruh haduh `20,000 na uwei u lanot ha North Garo Hills,” la ong u SP.
