Shillong, Lber 05
Ka tnat pulit jong ka Meghalaya ha ka jingïakhun ban rat dyngkhong ïa ka jingkynrei jong u drok hapoh ka jylla, ha kine ki ar snem kiba la leit, ka la ïoh ban kem ïa 610 ngut ki briew bad ban kurup ïa u drok uba shongdor haduh T. 300 klur.
U Director General of Police (DGP) ka Meghalaya u Dr LR Bishnoi haba pyntip ïa kane ha ka Sngi Ba-ar, u la ong ba na ka liang jong ki pulit ki la trei shitom khlem shongthait bad ha kaba ki la ïoh ban kurup ïa u drok ba shongdor `300 klur tang ha kine ki ar snem.
U DGP u la ong ba na kane ka `300 klur, ha u snem 2022 la ïoh kurup u drok ba shong dor T. 75 klur, ha u snem 2023 la ïoh kurup u drok ba shongdor `170 klur bad ha ki ar bnai jong u snem 2024 la ïoh kurup drok ba shongdor T. 21 klur.
Nalor nangta, u la ong ba ki pulit ki la ïoh ban kem noh ïa haduh 610 ngut ki briew kiba la donkti ha kane ka kam beaiñ kata hapdeng u snem 2022-2024. Napdeng ki 610 ngut, ha u snem 2022 la kem 234 ngut, ha u snem 2023 la kem 355 ngut bad 25 ngut ha u snem 2024 bad na kine ba la shah kem baroh, kumba 10 persen kiba shah kem ki dei kiba donkti ha ki kam khaïi briew.
U la pyntip ruh ba nalor kane, la kurup ïa u drok heroin uba khia haduh 26 kilo ha kine ki ar snem kiba la leit, kata ba kynthup haduh 7.5 kilo u heroin ha u snem 2022 bad 16.3 kilo ha u snem 2023 bad kumjuh ruh ha kine ki 2 bnai jong u snem 2024 la kurup kumba 1 kilo u heroin.
Katba ka jingïoh kurup ïa u ‘ganja’ pat ka la long shisha kaba heh ha une u snem 2024 ba tang ha kine ki ar bnai la ïoh haduh 4750 kilo, ba la kurup da ki pulit ka Ri-Bhoi, katba ha u snem 2022 la ïoh kurup 3987 kilo u ganja bad ha u snem 2023 la ïoh kurup 1400 kilo.
Ha kane ka sngi, na ka liang u DGP ryngkat ka tnat pulit ki la ïoh ban pynkup burom ruh ïa baroh kito ki pulit ka Ri-Bhoi kiba la don bynta ha ka ban bat ïa ka trok bad ban ïoh kurup ïa u ‘ganja’. Ïa kine la pynkup burom da ka syrnod ryngkat ka song pisa.
Nalor kane, u DGP u la pyntip ruh ba ki pulit ki la ïoh ruh ban kurup ïa ki ‘Yaba Tablet’ kaba la kiew, ha kaba u snem 2022 la ïoh kurup haduh 19 hajar tylli kitei ki tablet, ha u snem 2023 pat ka la kiew sha ka 60 hajar tylli ba la ïoh kurup bad ha ki 2 tylli ki bnai u 2024 dang ïoh kurup 2000 tylli.
Nalor kane, ki pulit ha ka sien kaba nyngkong eh ki la ïoh ruh ban kurup ïa uwei na ki jait drok ba kham remdor bad khlaiñ bor bha, uba la tip kum u ‘Crystal Meth’ ba khia haduh 14.2 kilo bad shongdor haduh 1.5 klur tyngka.
Ha kaba ïadei bad ki mukotduma kiba la pynrung kyrteng, u DGP u la ong ba ha u snem 2022 la pynrung kyrteng haduh 116 tylli ki mukotduma NDPS, ha u snem 2023 la pynrung kyrteng haduh 189 tylli ki mukotduma NDPS bad ha kine 2 tylli ki bnai jong u snem 2024 la pynrung kyrteng 13 tylli mukotduma.
U la ong ruh ba nalor kitei, ki pulit ki la ïoh ruh ban kurup ka pisa, kata haduh `36 lak ha u snem 2022, `45.6 lak ha u snem 2023 bad `60,000 ha u snem 2024 bad la ïoh ruh ban kurup ki kali, kata ha u snem 2022 la kurup 67 tylli, ha u snem 2023 la kurup 157 tylli bad ha u snem 2024 12 tylli.
Haba pynpaw ba ka Meghalaya ka dang mad ka jingeh na u drok haduh mynta, u DGP u la ong, “Kane ka dei namar ba ka jylla kam dei shuh tang ka lynti ïaid jong u drok hynrei ka la kylla long ka jaka pdeng ne ka ïew khaïi drok. Kumjuh ruh ka jingkiew jong ki nongdih drok hapoh ka jylla ka la ïai bteng ban kiew kaba long shisha ka jingsngewkhia kaba jur na ka bynta baroh.”
U la ong ba na ka liang ka tnat pulit ka la wad bun ki lad ki lynti kumno ban ïakhun pyrshah ïa kane ka jingeh, kata da kaba pynlong ki prokram ai jingpynshai sha ki samla, ha ki skul bad ki kolej, ka jingkhynra ba man ka por la ju pynlong bad kiwei kiwei ki lad ba la shim.
Shuh shuh u la ong ba ka tnat pulit ka la pyndonkam ruh da ki kor ka juk mynta ban kem ïa ki nongkhaïi drok.
