Shillong, Lber 05
Ka jingkhapngiah kaba wanrah ïa ka dheng kali kaba shyrkhei ha Shillong ka la pynlong ïa u Myntri barim ka Sorkar Jylla uba dei ruh u MLA ka UDP na Mawkyrwat, u Bah Renikton Lyngdoh Tongkhar ban wanrah katto- katne ki jingai jingmut na ka bynta ban ïarap weng ïa kane jingeh. Na ka liang une MLA u la buh ka jingtyrwa ban shna lai tylli ki surok kiba donkam bha, bad kita ki long, ka surok na Lawsohtun sha thaiñ Upper Shillong, nangta ka surok na thaiñ Lumparing ka ban ksam lyngba sha Laitkor, bad kawei pat ka dei ban shna surok na Mawlai Nongkwar ka ban ïaid lyngba ka Sonapani ban pynïasoh bad ka surokbah ha thaiñ Laimer, Upper Shillong.
U Bah Renikton u la ong ba ïa kine ki jingai jingmut u la dep ruh ban pynpaw teng ha Ïingdorbar Thawaiñ ha kane ka dorbar mang tyngka kaba dang shu dep ha kaba u la kren ïa kane ha por ba ïatai ïa ka jingkren jong u Lat.
U Bah Renikton u la ong ba kumba ka long mynta ki kali naduh ki kali kamai haduh ki kali kiba kit mar rep bad ki kali kiba kit ïa ki nongjngohkai pyrthei kim don da kiwei pat ki surok ban ïaid lait ïa ka surokbah hangne ha nongbah Shillong.
U la pyni nuksa ba ki kali kiba kit ïa ki nongjngohkai kiba sah ha ki ïingbasa kiba don ha thaiñ Lawsohtun, Lumparing, bad Laban kim don da kawei pat ka surok ban pei lyngba sha Upper Shillong hynrei ki hap ban tur ban pynkhapngiah lang ha thaiñ Civil Hospital bad Rhino lada ki kwah leitkai sha thaiñ Sohra bad kiwei kiwei ki jaka namar ym don surok da kawei pat kaba pei lyngba na thaiñ Lawsohtun sha Upper Shillong.
Kumta une u MLA ka Mawkyrwat u la ong ba lada ka Sorkar ka thaw ki lad ki lynti ban shna ïa ka surok kaba pynïasoh na Lawsohtun beit-beit sha thaiñ Upper Shillong kan long ka jingïarap ban weng ïa ka dheng kali.
Shuh shuh haba pynpaw ka jingsngewkhia namar ka dheng kali kaba jur ha surokbah naduh Mawlai Mawïong ter ter shaduh Lumdiengjri, KHADC, bad Garikhana, u Bah Renikton u la ong ba ka long kaba donkam haduh katta katta ban shna ïa ka surok ka ban pynïasoh ïa ka Mawlai Nongkwar bad ka thaiñ Laimer, Upper Shillong lyngba ka Sunapani. U la ong ki kali ha ka jaka ban kin wan lyngba ka surokbah sha Garikhana kin lah ban ïaid beit beit lyngba ka surok na Mawlai Nongkwar sha Laimer.
Haba sngewkhia ïa ki nongrep kiba shahktah ha ka dheng kali ha ka por ba ki wanrah ïa ki mar rep sha ïew, u Bah Renikton u la ong ba ki nongrep bad ki paidbah kiba wan na thaiñ Smit bad kiwei ki jaka sha Shillong ki hap ïaid tang lyngba ka surokbah na Laitkor, hynrei u la ai jingmut ïa ka Sorkar ban thaw lad ban shna sa kawei ka surok na thaiñ Lumparing ka ban pei lyngba sha Laitlor bad ïasoh bad ka surokbah Shillong-Jowai.
U la ong ba ki paidbah na ki thaiñ Smit, Mawryngkneng ki mad jingeh shibun namar ka dheng kali man Lanka sngi bym don surok da kawei pat lait na ka surokbah kaba ïaid na Madanrting sha Laitkor. U Bah Renikton u la ong ba ka Sorkar ka dei ban thawlad ban shna ïa ka surok na thaiñ Lumparing sha Laitkor ka ban ïarap ban pynduna ïa ka dheng kali.
Kumta une u MLA ka UDP na Mawkyrwat konstitwensi u la ong ba u don ka jingngeit kaba skhem ba ka Sorkar lyngba ka tnat kaba dei khmih kan thawlad kumno ban ïoh shna ïa kine ki surok lai tylli ki surok kiba donkam bha ki ban ïarap ban weng ïa ka dheng kali shikatdei eh ha kane ka nongbah Shillong.
