Shillong, Lber 05
Ka Tournament Commit-tee jong ka Shillong Sports Association (SSA) ka la shong jingïalang bad ki nongmihkhmat jong 8 tylli ki klob kiba dei ban ïashim bynta ha ka lympung ïalehkai Shillong Premier League 2023.
Ïa kane ka jingïalang la pynlong ha ka shlem treikam jong ka SSA kaba don ha First Ground, Polo bad la sngewthuh ba ïa ka rai kaba khatduh ka ban shim ha kaba ïadei bad ka SPL 2023, kan dei ha ka 9 tarik (sngi Saitjaiñ).
Wat la katta, ka SSA ka la lah ban pyndep ia baroh ki kyrdan ïalehkai na ka bynta ka aïom 2023, hynrei ka dangsah sa kawei pat ka lympung ïalehkai bad katei ka long ka SPL na ka daw ka jingbym ïoh madan ban pynlong bad ha kito ki por ka SSA Stadium ka dangdon hapdeng ka jingmaramot pynbha ban siang da u phlang plastik.
Ki lympung kiba la lah ban pyndep na ka bynta ka samoi ïalehkai jong u snem 2023 ki kynthup ïa ka Fourth Division, Third Division, Second Division, First Division bad la bynrap lang ruh sa ka lympung ïalehkai jong ki kynthei (Women’s Football League), ka U-10 bad ka U-14 bad kumjuh ka U-16.
Haba pyrshang ban wad jingtip halor kane ka jingïalang, na ka liang ki nongïalam ka SSA bad ki dkhot ba la wan ban mihkhmat jong 8 tylli ki klob kim shym la treh satia ban pynpaw eiei, da kaba ki la kam ba ïa kaei kaba la ïathir ïatai ha kane ka jingïalang kaba mynta ka sngi yn sa ïashong biang ha ka 9 tarik shwa ban shim ïa ka rai kaba khatduh.
Kitei ki phra tylli ki klob ki ban ïashim bynta ha ka SPL 2023 ki long ka Mawlai SC kaba long ka lahduh jong ka aïom ba la lah, kumjuh ka lahduh jong ka Meghalaya State League ka Rangdajied United FC, ka Shil-long Lajong FC, Langsning FC, Ryntih FC, Nangkiew Irat SC ryng-kat ka Nongthymmai S&CC bad ka Sawmer SC ki la kiew kyrdan na ka First Division jong u snem 2022.
Lah ban pynkynmaw ba dangshen ka SSA ka la pynbna ban sdang noh ïa ka SPL ha ka 15 tarik mynta u bnai ha kaba ka Nongthymmai kan ïakhun pyrshah ïa ka Rangdajied United, hynrei la sngewthuh ba ïa kane ka lympung la hap ban kynriah shaduh u Ïaïong mynta u snem.
