Shillong, Lber 05
Ka Coordination Committee jong katto-katne tylli ki tnat ka Sorkar Jylla ha ryngkat ki bor district na ki ar tylli ki district kin ïakynduh ban ïakren halor ka jingkhang ïa ki kali ban ïaid lyngba ka jingkieng ha Pung Umïam ha shwa ban pyntip ruh ïa kane ka kam sha ka Kynhun Myntri (Cabinet).
La ong ba ka Coordination Committee kaba kynthup ïa ka tnat Bording, PWD, Home (Police), Transport, MeECL, ki bor district na Ri-Bhoi bad East Khasi Hills kin ïakynduh ban ïakren bad shim ki rai kiba donkam namarba hap ban khang ïa ki kali ha ka sngi ba rah ïa ka jingkieng shalor ban thep ïa ki ‘bearing’ kiba thymmai kumjuh ruh ha ka sngi kaba pynhiar ïa ka jingkieng ban pynshong bha ha kajuh ka jaka ba ka don.
Ha ka jingshisha ka Sorkar ka la kwah ban leh ïa kane ha u Rymphang hynrei la rah noh sha une u bnai ba mynta. Ka tyllong khubor ka ïathuh ba ka jingrah ïa ka jingkieng ka lah ban long ha shiteng jong mynta u bnai kata tang hadien ba la dep ban khmih lut ïa ki jingdonkam.
Ynda la khang ïa ka jingkieng ha Pung Umïam ki kali rit ki hap pyndonkam ïa ka surok Umroi-Mawlai lyngba ka shnong Umrynjah lane ka surok Madan Nonglakhiat-Mawsiatkhnam ban wan Shillong ne haba leit na Shillong sha Guwahati bad Ri Bhoi.
Ki kali heh kin hap ïaid na Shillong Bypass bad rung lyngba ka Diengpasoh ban poi sha Shillong lane leit swait naduh Mawryngkneng.
Kumba ka long mynta ka jingmaramot ïa ka jaka ba den ïa ka pung Umïam ka dang ïaid shakhmat ha kaba la ksam ïa ki thliew ban theh dewbilat thymmai khnang ban pynskhem ïa kane ka jingtei kaba den ïa ka um.
